റായ്‌പൂര്‍: ഇന്ത്യയ്‌ക്കെതിരായ രണ്ടാം ഏകദിനത്തില്‍ ടോസ് നഷ്‌ടപ്പെട്ട് ബാറ്റ് ചെയ്യാനിറങ്ങിയ കിവീസിന് കിളി പാറിയ തുടക്കമാണ് ഇന്ത്യന്‍ പേസര്‍മാര്‍ നല്‍കിയത്. മുഹമ്മദ് ഷമി തുടങ്ങിവച്ച വിക്കറ്റ് വേട്ടയില്‍ സിറാജും ശാര്‍ദുലും ഹാര്‍ദിക്കും ചേര്‍ന്നതോടെ ന്യൂസിലന്‍ഡിന്‍റെ ടോപ് ഓര്‍ഡര്‍ ബാറ്റര്‍മാര്‍ക്ക് നിലം തൊടാന്‍ കഴിഞ്ഞിരുന്നില്ല.
ഹൈദരാബാദില്‍ നടന്ന ഒന്നാം ഏകദിനത്തില്‍ ഏഴോവറില്‍ 70 റണ്‍സ് വഴങ്ങിയ ഹാര്‍ദിക് പാണ്ഡ്യ ഏറെ നിരാശപ്പെടുത്തിയിരുന്നു. എന്നാല്‍ കിവീസിന്‍റെ വിശ്വസ്‌തന്‍ ഡെവോണ്‍ കോണ്‍വെയെ പുറത്താക്കിയാണ് ഹാര്‍ദിക് വിക്കറ്റ് വേട്ടക്കാരുടെ പട്ടികയില്‍ ചേര്‍ന്നത്. വിക്കറ്റ് വീഴ്‌ചയ്‌ക്കിടെയിലും ചെറുത്ത് നില്‍പ്പിന് ശ്രമിച്ച കോണ്‍വെയെ തകര്‍പ്പന്‍ റിട്ടേണ്‍ ക്യാച്ചിലൂടെ ഹാര്‍ദിക് പുറത്താക്കിയത് അമ്പരപ്പോടെയാണ് ആരാധകര്‍ കണ്ടത്.