അഹമ്മദാബാദ്:ഏകദിന ലോകകപ്പിന്‍റെ ഒരു പതിപ്പില്‍ ഏറ്റവും കൂടുതല്‍ റണ്‍സ് നേടുന്ന ക്യാപ്റ്റനെന്ന റെക്കോഡ് സ്വന്തമാക്കി രോഹിത് ശര്‍മ (Rohit Sharma becomes highest Runs scoring captain in single World Cup edition). ഏകദിന ലോകകപ്പ് 2023-ന്‍റെ ഫൈനലില്‍ ഓസ്‌ട്രേലിയയ്‌ക്ക് (India vs Australia Cricket World Cup 2023) എതിരായ പ്രകടനത്തോടെയാണ് രോഹിത് (Rohit Sharma) റെക്കോഡിട്ടത്. മത്സരത്തില്‍ 31 പന്തില്‍ നാല് ഫോറുകളും മൂന്ന് സിക്‌സും സഹിതം 47 റണ്‍സാണ് ഹിറ്റ്‌മാന്‍ അടിച്ചെടുത്തത്.
ഇതടക്കം ഈ ലോകകപ്പില്‍ (Cricket World Cup 2023) 11 ഇന്നിങ്‌സുകളില്‍ നിന്നായി രോഹിത്തിന്‍റെ അക്കൗണ്ടിലുള്ളത് ആകെ 597 റണ്‍സാണ് (Rohit Sharma Runs In Cricket World Cup 2023). ഹിറ്റ്‌മാന്‍റെ ഈ പ്രകടനത്തോടെ ന്യൂസിലന്‍ഡ് നായകന്‍ കെയ്ന് വില്യംസണ്‍ (Kane Williamson) 2019-ലെ ലോകകപ്പില്‍ സ്ഥാപിച്ച റെക്കോഡാണ് പഴങ്കഥയായത് (Rohit Sharma breaks Kane Williamson record for most runs by a captain single World Cup edition). അന്ന് 578 റണ്‍സടിച്ചതായിരുന്നു വില്യംസണിന്‍റെ റെക്കോഡ്.
ശ്രീലങ്കയുടെ മഹേല ജയവര്‍ധന (2007-ല്‍ 548 റണ്‍സ്), ഓസ്‌ട്രേലിയയുടെ റിക്കി പോണ്ടിങ് (2007-ല്‍ 539 റണ്‍സ്), ഓസ്‌ട്രേലിയയുടെ തന്നെ ആരോണ്‍ ഫിഞ്ച് (2019-ല്‍ 507 റണ്‍സ്), ഇന്ത്യയുടെ സൗരവ് ഗാംഗുലി (2003-ല്‍ 456 റണ്‍സ്), ശ്രീലങ്കയുടെ കുമാര്‍ സംഗക്കാര (2011-ല്‍ 465 റണ്‍സ്) എന്നിവരാണ് യഥാക്രമം പിന്നിലുള്ളത്.
അതേസമയം അഹമ്മദാബാദിലെ നരേന്ദ്ര മോദി സ്റ്റേഡിയത്തില്‍ നടക്കുന്ന മത്സരത്തില്‍ ടോസ് നേടിയ ഓസ്‌ട്രേലിയന്‍ നായകന്‍ പാറ്റ് കമ്മിന്‍സ് ഇന്ത്യയെ ബാറ്റിങ്ങിന് അയയ്‌ക്കുകയായിരുന്നു. ശുഭ്‌മാന്‍ ഗില്‍ വേഗം മടങ്ങിയെങ്കിലും തന്‍റെ ആക്രമണോത്സുക ബാറ്റിങ് തുടര്‍ന്ന രോഹിത്തിനെ 10-ാം ഓവറിലാണ് ഇന്ത്യയ്‌ക്ക് നഷ്‌ടമാവുന്നത്. ഗ്ലെന്‍ മാക്‌സ്‌വെല്ലിനെ അതിര്‍ത്തി കടത്താനുള്ള ശ്രമം പാളിയതോടെ ട്രാവിസ് ഹെഡ് പിടികൂടിയായിരുന്നു ഹിറ്റ്‌മാന്‍റെ മടക്കം.