നോയ്‌ഡ : ക്രിക്കറ്റില്‍ ഫീല്‍ഡ് ചെയ്യുന്നതിനിടെ പന്ത് തലയില്‍ കൊണ്ട് മുംബൈയില്‍ 52-കാരന്‍ മരിച്ചതിന്‍റെ വാര്‍ത്ത നേരത്തെ പുറത്ത് വന്നിരുന്നു. ഇതിന്‍റെ ഞെട്ടല്‍ മാറും മുമ്പ് ക്രിക്കറ്റ് ഗ്രൗണ്ടില്‍ നിന്നും മറ്റൊരു മരണവാര്‍ത്ത കൂടി പുറത്ത് എത്തിയിരിക്കുകയാണ്. നോയ്‌ഡയില്‍ ക്രിക്കറ്റ് കളിക്കുന്നതിനിടെ 34-കാരനായ വികാസ് നേഗിയാണ് കുഴഞ്ഞുവീണ് മരിച്ചത്(Heart attack while batting).
എസ് ആൻഡ് ബി ഇന്ത്യ ആനിവല്‍ ക്രിക്കറ്റ് ടൂര്‍ണമെന്‍റില്‍ മാവെറിക്‌സ് ഇലവനും ബ്ലേസിംഗ് ബുൾസും തമ്മിലുള്ള മത്സരത്തിനിടെയാണ് ദാരുണ സംഭവം നടന്നത്. മാവെറിക്‌സ് ഇലവനായി ബാറ്റ് ചെയ്യവെയാണ് വികാസ് നേഗി കുഴഞ്ഞുവീഴുന്നത്. ഇന്നിങ്‌സിന്‍റെ 14-ാം ഓവറിലായിരുന്നു സംഭവം.
സ്‌ട്രൈക്കിലുണ്ടായിരുന്ന ഉമേഷ് കുമാര്‍ എന്നയാള്‍ പന്തടിച്ചതോടെ നോണ്‍ സ്ട്രൈക്കറായിരുന്ന വികാസ് നേഗി സിംഗിളിന് ശ്രമം നടത്തി. എന്നാല്‍ പന്ത് ബൗണ്ടറിയിലേക്ക് എത്തിയതോടെ ഉമേഷിനെ അഭിനന്ദിച്ച് നോണ്‍ സ്ട്രൈക്കിങ്‌ എന്‍ഡിലേക്ക് തിരികെ നടക്കാന്‍ ഒരുങ്ങവെയാണ് നേഗി കുഴഞ്ഞുവീഴുന്നത്.
ഇതുകണ്ടതോടെ പൊടുന്നനെ തന്നെ കളത്തിലുണ്ടായിരുന്നവര്‍ നേഗിക്ക് അരികിലേക്ക് ഓടിയെത്തി. സിപിആര്‍ നല്‍കിയശേഷം ഉടനെ തന്നെ ആശുപത്രിയിലേക്ക് എത്തിച്ചെങ്കിലും മരിച്ചിരുന്നു. മത്സരത്തില്‍ ആറ് പന്തുകള്‍ നേരിട്ട നേഗി ഏഴ്‌ റണ്‍സായിരുന്നു നേടിയിരുന്നത്. മാവെറിക്‌സ് ഇലവനും ബ്ലേസിംഗ് ബുൾസും തമ്മിലുള്ള മത്സരം യൂട്യൂബില്‍ ലൈവ് സ്‌ട്രീമിങ് ചെയ്യുന്നുണ്ടായിരുന്നു.