മുംബൈ : ഏകദിന ലോകകപ്പിന് (Cricket World Cup 2023) ഇന്ത്യന്‍ മണ്ണില്‍ നാളെ അരങ്ങുണരുകയാണ്. ഉദ്‌ഘാടന മത്സരത്തില്‍ നിലവിലെ ചാമ്പ്യന്മാരായ ഇംഗ്ലണ്ടും കഴിഞ്ഞ തവണത്തെ രണ്ടാം സ്ഥാനക്കാരായ ന്യൂസിലന്‍ഡുമാണ് ഏറ്റുമുട്ടുന്നത്. 2019-ല്‍ ഇംഗ്ലണ്ടിലായിരുന്നു ടൂര്‍ണമെന്‍റിന്‍റെ കഴിഞ്ഞ പതിപ്പ് അരങ്ങേറിയത്. സ്വന്തം മണ്ണില്‍ ഒരു വിവാദ നിയമത്തിന്‍റെ ആനൂകൂല്യത്തിലായിരുന്നു ഇംഗ്ലീഷ് ടീം കിരീടം ഉയര്‍ത്തിയത്.
ക്രിക്കറ്റിന്‍റെ മെക്കയായ ലോര്‍ഡ്‌സില്‍ അരങ്ങേറിയ ഫൈനല്‍ മത്സരം സമനിലയില്‍ കലാശിച്ചു. തുടര്‍ന്ന് നടന്ന സൂപ്പര്‍ ഓവറും സമനിലയിലായി. ഒടുവില്‍ മത്സരത്തില്‍ അടിച്ച ബൗണ്ടറികളുടെ അടിസ്ഥാനത്തിലായിരുന്നു ന്യൂസിലന്‍ഡിനെ മറികടന്ന് ഇംഗ്ലണ്ട് കിരീടം നേടിയത്. കിവികള്‍ക്ക് ഒപ്പം സകല ക്രിക്കറ്റ് ആരാധകരെയും കടുത്ത നിരാശയിലാക്കിയ ഐസിസിയുടെ പ്രസ്‌തുത നിയമം കനത്ത വിമര്‍ശനങ്ങള്‍ക്ക് വഴിയൊരുക്കിയിരുന്നു.
ഇതിന് പിന്നാലെ ലോകകപ്പിന്‍റെ പുതിയ പതിപ്പില്‍ ഈ വിവാദ നിയമം ഒഴിവാക്കിയിരിക്കുകയാണ് ഐസിസി (ICC Changed boundary rule). ഇനി മുതല്‍ സൂപ്പര്‍ ഓവര്‍ സമനിലയില്‍ കലാശിച്ചാല്‍ വിജയിയെ നിര്‍ണയിക്കുക 'മള്‍ട്ടിപ്പിള്‍ സൂപ്പര്‍ ഓവര്‍' നിയമത്തിലൂടെയാവും (multiple Super Overs rule). ഇതുപ്രകാരം സമനില ഒഴിയും വരെ ഒന്നിലധികം സൂപ്പർ ഓവറുകൾ എറിഞ്ഞായിരിക്കും വിജയിയെ കണ്ടെത്തുക.
ടൂര്‍ണമെന്‍റിന്‍റെ സെമി-ഫൈനലുകളോ അല്ലെങ്കിൽ ഫൈനലോ സമനിലയില്‍ അവസാനിച്ചാല്‍ മാത്രമേ സൂപ്പര്‍ ഓവറിലൂടെ വിജയിയെ കണ്ടെത്തൂ. ഗ്രൂപ്പ്‌ ഘട്ടത്തില്‍ 50 ഓവറുകളുടെ മുഴുവൻ ക്വാട്ടയ്ക്ക് ശേഷം രണ്ട് ടീമുകളും റണ്ണിൽ സമനിലയിലായാൽ മത്സരം 'ടൈ' ആയി പ്രഖ്യാപിക്കുകയാണ് ചെയ്യുക.
അതേസമയം ഒക്‌ടോബര്‍ അഞ്ച് മുതല്‍ നവംബര്‍ 19 വരെയാണ് ഇന്ത്യയില്‍ ഏകദിന ലോകകപ്പ് നടക്കുക. ആതിഥേയര്‍ക്ക് പുറമെ പാകിസ്ഥാൻ, ദക്ഷിണാഫ്രിക്ക, ഓസ്‌ട്രേലിയ, അഫ്‌ഗാനിസ്ഥാൻ, ഇംഗ്ലണ്ട്, ബംഗ്ലാദേശ്, ന്യൂസിലൻഡ്, ശ്രീലങ്ക, നെതര്‍ലാന്‍ഡ്‌സ് എന്നീ ടീമുകളാണ് ടൂര്‍ണമെന്‍റില്‍ മാറ്റുരയ്‌ക്കുന്നത്. നെതര്‍ലാന്‍ഡ്‌സും ശ്രീലങ്കയും യോഗ്യതാ മത്സരങ്ങള്‍ കളിച്ചെത്തുമ്പോള്‍ മറ്റ് ടീമുകള്‍ ലോകകപ്പിന് നേരിട്ട് യോഗ്യത ഉറപ്പിച്ചിരുന്നു.