മാഞ്ചസ്റ്റര്‍: ഓള്‍ഡ്ട്രാഫോഡ് ടി 20യില്‍ പാകിസ്ഥാന് എതിരെ ഇംഗ്ലണ്ടിന് അഞ്ച് വിക്കറ്റ് ജയം. പാകിസ്ഥാന് ഉയര്‍ത്തിയ 195 റണ്‍സെന്ന ലക്ഷ്യം അഞ്ച് പന്ത് ശേഷിക്കെ ആതിഥേയര്‍ മറികടന്നു. ഡേവിഡ് മലാനും നായകന്‍ ഇയാന്‍ മോര്‍ഗനും ചേര്‍ന്ന് മൂന്നാം വിക്കറ്റ് കൂട്ടുകെട്ടാണ് ഇംഗ്ലണ്ടിന്‍റെ ജയം ഉറപ്പാക്കിയത്. ഇരുവരും ചേര്‍ന്നുള്ള സെഞ്ച്വറി കൂട്ടുകെട്ടില്‍ 112 റണ്‍സാണ് സ്‌കോര്‍ ബോര്‍ഡില്‍ ചേര്‍ത്തത്.
വെടിക്കെട്ട് ബാറ്റിങ്ങാണ് ഇരുവരും മാഞ്ചസ്റ്ററില്‍ പുറത്തെടുത്തത്. 33 പന്തില്‍ നാല് സിക്‌സും ആറ് ഫോറും ഉള്‍പ്പെടെ മോര്‍ഗന്‍ അര്‍ദ്ധസെഞ്ച്വറിയോടെ 66 റണ്‍സെടുത്തു. മൂന്നാമനായി ഇറങ്ങിയ മലാന്‍ ഒരു സിക്‌സും ആറ് ഫോറും ഉള്‍പ്പെടെ പുറത്താകാതെ അര്‍ദ്ധസെഞ്ച്വറിയോടെ 54 റണ്‍സെടുത്തു. ഏഴാമത്തെ തവണയാണ് മോര്‍ഗന്‍ ടി 20 ക്രിക്കറ്റില്‍ സെഞ്ച്വറി കൂട്ടുകെട്ടുണ്ടാക്കുന്നത്. മോര്‍ഗന്‍റെ ടി 20 കരിയറിലെ 14മത്തെ അര്‍ദ്ധസെഞ്ച്വറിയാണ് പാകിസ്ഥാനെതിരെ പിറന്നത്.