മൊഹാലി: ഐപിഎല്ലിലെ 52ാം മത്സരത്തില്‍ കിംഗ്സ് ഇലവൻ പഞ്ചാബ് ഇന്ന് കൊല്‍ക്കത്ത നൈറ്റ് റൈഡേഴ്സുമായി ഏറ്റുമുട്ടും. മൊഹാലി ഐ എസ് ബിന്ദ്ര സ്റ്റേഡിയത്തില്‍ രാത്രി എട്ട് മണിക്കാണ് മത്സരം. പ്ലേ ഓഫില്‍ കടക്കാൻ ഇരുടീമുകൾക്കും ഇന്ന് ജയിക്കണം.
പന്ത്രണ്ട് മത്സരങ്ങളില്‍ നിന്ന് പത്ത് പോയിന്‍റ് വീതമുള്ള കൊല്‍ക്കത്ത നൈറ്റ് റൈഡേഴ്സും കിംഗ്സ് ഇലവൻ പഞ്ചാബും ആറും ഏഴും സ്ഥാനത്താണ്. സീസണില്‍ മികച്ച തുടക്കമാണ് കൊല്‍ക്കത്തയ്ക്ക് ലഭിച്ചത്. എന്നാല്‍ ആ ഫോം തുടരാൻ നൈറ്റ് റൈഡേഴ്സിന് കഴിഞ്ഞില്ല എന്നതാണ് വാസ്തവം. തകർപ്പൻ പ്രകടനം കാഴ്ചവയ്ക്കുന്ന വെസ്റ്റ് ഇൻഡീസ് താരം ആന്ദ്രേ റസ്സലിനെ അമിതമായി ആശ്രയിച്ചതാണ് കൊല്‍ക്കത്തയ്ക്ക് തിരിച്ചടിയായത്. മുംബൈക്കെതിരായ കഴിഞ്ഞ മത്സരത്തില്‍ ജയിച്ചെങ്കിലും ദിനേഷ് കാർത്തിക്ക് നയിക്കുന്ന കൊല്‍ക്കത്തയ്ക്ക് പ്ലേ ഓഫ് ഉറപ്പിക്കാൻ ശേഷിക്കുന്ന രണ്ട് മത്സരങ്ങളിലും ജയിക്കണം. റസ്സലിന് പുറമെ ശുഭ്മാൻ ഗില്‍, ക്രിസ് ലിൻ എന്നിവരും ഭേദപ്പെട്ട പ്രകടനമാണ് കാഴ്ചവയ്ക്കുന്നത്. മുംബൈക്കെതിരെ 232 റൺസിന്‍റെ വിജയലക്ഷ്യം ഉയർത്തിയ കൊല്‍ക്കത്ത പഞ്ചാബിനെതിരെ അതേ ഫോം തുടരാനാകും ശ്രമിക്കുക. കഴിഞ്ഞ മത്സരത്തില്‍ മലയാളി താരം സന്ദീപ് വാര്യർ കൊല്‍ക്കത്തയ്ക്ക് വേണ്ടി അരങ്ങറിയിരുന്നു. മികച്ച പ്രകടനം കാഴ്ചവച്ച സന്ദീപിനെ കൊല്‍ക്കത്ത ഇന്നും കളിപ്പിച്ചേക്കും.