വാംഖഡെയില്‍ ഇന്ത്യ ബാറ്റ് ചെയ്യുന്നു; ലോകേഷ് രാഹുല്‍ ടീമില്‍
ലോകേഷ് രാഹുല്‍ ഇന്ത്യൻ ഏകദിന ടീമില്‍ തിരിച്ചെത്തി. കോലിക്ക് പകരം വൺഡൗണായി ബാറ്റ് ചെയ്യാനെത്തിയതും രാഹുലാണ്. ഓസീസ് നിരയില്‍ ടെസ്റ്റ് സൂപ്പർ താരം മാർനസ് ലബുഷെയ്‌ൻ അരങ്ങേറ്റം കുറിച്ചു
മുംബൈ; ഇന്ത്യ- ഓസീസ് ഏകദിന പരമ്പരയ്ക്ക് മുംബൈ വാംഖഡെ സ്റ്റേഡിയത്തില്‍ തുടക്കം. ടോസ് നേടിയ ഓസീസ് ഇന്ത്യയെ ബാറ്റിംഗിനയച്ചു.
ലോകേഷ് രാഹുല്‍ ഇന്ത്യൻ ഏകദിന ടീമില്‍ തിരിച്ചെത്തി. കോലിക്ക് പകരം വൺഡൗണായി ബാറ്റ് ചെയ്യാനെത്തിയതും രാഹുലാണ്. രോഹിത് ശർമ, ശിഖർ ധവാൻ, ലോകേഷ് രാഹുല്‍ എന്നി മൂന്ന് ഓപ്പണർമാർ ഇന്നത്തെ മത്സരത്തില്‍ കളിക്കുന്നുണ്ട്. വിരാട് കോലി, ശ്രേയസ് അയ്യർ, റിഷഭ് പന്ത്, എന്നിവർ ബാറ്റിങ് നിരയില്‍ അണിനിരക്കുമ്പോൾ ഓൾറൗണ്ടറായി രവീന്ദ്രജഡേജ ടീമിലെത്തി. കുല്‍ദീപ് യാദവാണ് സ്പിന്നർ.
ശാർദുല്‍ താക്കൂർ, മുഹമ്മദ് ഷമി, ജസ്പ്രീത് ബുംറ എന്നിവർ പേസർമാരായും ടീമിലുണ്ട്. ബുംറ ലോകകപ്പിന് ശേഷം ആദ്യമായാണ് ഇന്ത്യൻ ഏകദിന ടീമില്‍ കളിക്കുന്നത്.
ഓസീസ് നിരയില്‍ ടെസ്റ്റ് സൂപ്പർ താരം മാർനസ് ലബുഷെയ്‌ൻ അരങ്ങേറ്റം കുറിച്ചു. ആസ്റ്റൺ ആഗർ, ആഡം സാംപ എന്നിവർ സ്പിന്നർമാരായി ടീമില്‍ ഇടംപിടിച്ചപ്പോൾ പാറ്റ് കമ്മിൻസ്, മിച്ചല്‍ സ്റ്റാർക്ക്, കെയ്‌ൻ റിച്ചാർഡ്സൺ എന്നിവർ പേസ് ഡിപ്പാർട്ട്മെന്‍റ് കൈകാര്യം ചെയ്യും.