ഐപിഎല്‍ പ്ലേ ഓഫിലെത്തുന്ന നാലാമത്തെയും അവസാനത്തെയും ടീം ഏതായിരിക്കുമെന്ന ആകാംക്ഷയിലാണ് ക്രിക്കറ്റ് ആരാധകർ. ചെന്നൈ സൂപ്പർ കിംഗ്സ്, മുംബൈ ഇന്ത്യൻസ്, ഡല്‍ഹി ക്യാപിറ്റല്‍സ് എന്നിവർ ഇതിനകം പ്ലേ ഓഫില്‍ സ്ഥാനമുറപ്പിച്ചു. ശേഷിക്കുന്ന ഒരേയൊരു സ്ഥാനത്തേക്ക് ആര് കളിക്കുമെന്ന് അറിയാൻ ഇന്നത്തെയും നാളത്തെയും മത്സരങ്ങൾ നിർണായകമാണ്.
നാല് ടീമുകളാണ് ശേഷിക്കുന്ന ഒരു സ്ഥാനത്തിനായി പോരാടുന്നത്. സൺറൈസേഴ്സ് ഹൈദരാബാദ്, രാജസ്ഥാൻ റോയല്‍സ്, കൊല്‍ക്കത്ത നൈറ്റ് റൈഡേഴ്സ് എന്നിവർ മുൻ നിരയില്‍ നില്‍ക്കുമ്പോൾ കിംഗ്സ് ഇലവൻ പഞ്ചാബിന് നേരിയ സാധ്യത മാത്രമാണ് നിലനില്‍ക്കുന്നത്. എല്ലാ ടീമുകൾക്കും ഒരു മത്സരം മാത്രമാണ് ശേഷിക്കുന്നതും.
സൺറൈസേഴ്സ് ഹൈദരാബാദ്
പ്ലേ ഓഫ് സാധ്യത ഏറ്റവും കൂടുതലുള്ള ടീമാണ് സൺറൈസേഴ്സ് ഹൈദരാബാദ്. മുംബൈക്കെതിരായ കഴിഞ്ഞ മത്സരത്തില്‍ ജയിച്ചിരുന്നുവെങ്കില്‍ ഹൈദരാബാദിന്‍റെ പ്ലേ ഓഫ് പ്രവേശനം എളുപ്പമാവുമായിരുന്നു. നിലവില്‍ 13 മത്സരങ്ങളില്‍ നിന്ന് 12 പോയിന്‍റുള്ള സൺറൈസേഴ്സ് നാലാം സ്ഥാനത്താണ്. ഉയർന്ന റൺറേറ്റാണ് സൺറൈസേഴ്സിന്‍റെ സാധ്യത വർധിക്കാൻ കാരണം. ഒന്നാം സ്ഥാനത്തുള്ള ചെന്നൈയെക്കാൾ ഒരുപാട് മുകളിലാണ് സൺറൈസേഴ്സിന്‍റെ റൺറേറ്റ്. ഇന്ന് റോയല്‍ ചലഞ്ചേഴ്സ് ബാംഗ്ലൂരിനെ തോല്‍പ്പിച്ചാല്‍ ഹൈദരാബാദിന് പ്ലേ ഓഫിലെത്താം. ബാംഗ്ലൂരിനെതിരെ വലിയ തോല്‍വി വഴങ്ങാതിരിക്കുകയും കൊല്‍ക്കത്തയും രാജസ്ഥാനും തോല്‍ക്കുകയും ചെയ്താല്‍ ഇതേ റൺറേറ്റിന്‍റെ ആനുകൂല്യത്തില്‍ ഹൈദരാബാദിന് പ്ലേ ഓഫില്‍ സ്ഥാനമുറപ്പിക്കാം.