ന്യൂഡല്ഹി: മലേഷ്യന് ഓപ്പണിനായി ഇന്ത്യൻ ബാഡ്മിന്റൺ താരങ്ങള് അടുത്ത മാസം ദോഹ വഴി മലേഷ്യയിലേക്ക് പോകുമെന്നും തുടർന്ന് ജൂൺ മാസത്തിൽ നടക്കുന്ന സിങ്കപ്പൂർ ഓപ്പണിനായി സിങ്കപ്പൂരിലേക്ക് പോകുമെന്നും ബാഡ്മിന്റൺ അസോസിയേഷൻ ഓഫ് ഇന്ത്യ (ബിഎഐ) അറിയിച്ചു. മേയ് 25 മുതൽ 30 വരെയാണ് മലേഷ്യ ഓപ്പണ് മത്സരങ്ങള് നടക്കുക. ജൂൺ ഒന്ന് മുതൽ ആറ് വരെയാണ് സിങ്കപ്പൂർ ഓപ്പണ്.
ഒളിമ്പിക് യോഗ്യത കലണ്ടറിൽ ഉൾപ്പെടുത്തിയിട്ടുള്ള അവസാന ടൂർണമെന്റുകളാണ് ഇവ രണ്ടും. അതേസമയം കൊവിഡിനെ തുടര്ന്ന് ഇന്ത്യയിൽ നിന്നുള്ള വിമാനങ്ങൾക്ക് താൽകാലിക വിലക്ക് ഏർപ്പെടുത്തിയതിനാൽ ടൂര്ണമെന്റുകളില് ഇന്ത്യന് താരങ്ങള്ക്ക് പങ്കെടുക്കാൻ കഴിയുമോ എന്ന ആശങ്ക ഉയർന്നിരുന്നു. ബിഎഐയുടെ അറിയിപ്പോടെ ഇത്തരം ആശങ്കകള്ക്കും വിരാമമായിരിക്കുകയാണ്.