ബാലി: ബിഡബ്ല്യുഎഫ് വേള്‍ഡ് ടൂര്‍ ഫൈനല്‍സ് ബാഡ്‌മിന്‍റണ്‍ ടൂര്‍ണമെന്‍റിന്‍റെ കലാശപ്പോരിന് യോഗ്യത നേടി ഇന്ത്യയുടെ പിവി സിന്ധു. സെമി ഫൈനലില്‍ ജപ്പാന്‍റെ അകാനെ യമാഗുച്ചിയെ കീഴടക്കിയാണ് സിന്ധുവിന്‍റെ ഫൈനല്‍ പ്രവേശനം. ഒരു മണിക്കൂര്‍ 10 മിനിട്ട് നീണ്ടുനിന്ന മത്സരത്തില്‍ ഒന്നിനെതിരെ രണ്ട് സെറ്റുകള്‍ക്കാണ് ഇന്ത്യന്‍ താരത്തിന്‍റെ വിജയം.
ലോക മുന്നാം നമ്പറായ യമാഗുച്ചിക്കെതിരെ ആദ്യ സെറ്റ് (21-15ന്) സ്വന്തമാക്കിയ സിന്ധുവിന് മിന്നുന്ന തുടക്കമാണ് ലഭിച്ചത്. എന്നാല്‍ രണ്ടാം സെറ്റ് ഇതേ സ്‌കോറിന് താരത്തിന് കൈമോശം വന്നു. തുടര്‍ന്ന് നിര്‍ണായകമായ മൂന്നാം സെറ്റില്‍ യമാഗുച്ചി കടുത്ത വെല്ലുവിളി ഉയര്‍ത്തിയെങ്കിലും 21-19ന് സെറ്റും മത്സരവും സിന്ധു സ്വന്തമാക്കി. സ്‌കോര്‍: 21-15, 15-21, 21-19.