വിസ്മയയുടെ മരണത്തിൽ സമൂഹത്തിന്റെ നാനാഭാഗത്ത് നിന്നും രോഷപ്രകടനങ്ങളും വിമർശനങ്ങളും ഉയരുകയാണ്. ജയറാമും കാളിദാസ് ജയറാമും അഹാനയുമടക്കം സംഭവത്തിൽ പ്രതികരണവുമായി നിരവധി സിനിമാതാരങ്ങളും എത്തിയിരുന്നു.
കൂട്ടത്തിൽ യുവനടൻ കാളിദാസ് ജയറാം കഴിഞ്ഞ ദിവസം പങ്കുവച്ച ഫേസ്ബുക്ക് കുറിപ്പാണ് ശ്രദ്ധ നേടുന്നത്. സാക്ഷരതയുടെയും അറിവിന്റെയും കാലഘട്ടത്തിൽ ഉണ്ടാകുന്ന ഇത്തരം സംഭവങ്ങൾ അംഗീകരിക്കാനാകില്ലെന്ന് കാളിദാസ് പ്രതികരിച്ചു. ഒപ്പം, ഫേസ്ബുക്ക് പോസ്റ്റിനവസാനം കാളിദാസ് കൂട്ടിച്ചേർത്ത വാക്കുകളും ശ്രദ്ധേയമായി.
വിസ്മയ ഒരിക്കൽ തനിക്കെഴുതിയ കത്ത് തന്റെ പക്കലെത്തിയെന്നും എന്നാൽ വിസ്മയയുടെ വിയോഗത്തിന് ശേഷമാണ് കത്ത് കിട്ടിയതെന്നും താരം പറഞ്ഞു. ആരും കേൾക്കാതെ പോയ ആ ശബ്ദത്തിനും എരിഞ്ഞമർന്ന സ്വപ്നങ്ങൾക്കും മാപ്പ് എന്നും കാളിദാസ് ഫേസ്ബുക്കിൽ എഴുതി.
പണ്ട് കോളജിലെ വാലന്റൈൻസ് ഡേയിൽ സംഘടിപ്പിച്ച ലവ് ലെറ്റർ കോമ്പറ്റിഷന്റെ ഭാഗമായാണ് വിസ്മയ കാളിദാസിനായി തമാശയ്ക്ക് പ്രണയലേഖനം എഴുതിയത്. വിസ്മയയുടെ കത്ത് സുഹൃത്തായ അരുണിമയാണ് വീണ്ടും സമൂഹമാധ്യമങ്ങളിൽ പങ്കുവച്ചത്. ഇതിന് പിന്നാലെയാണ് പ്രണയലേഖനം കാളിദാസിന്റെ ശ്രദ്ധയിൽപെട്ടത്.
More Read:വിസ്മയയുടെ മരണത്തിൽ രോഷമറിയിച്ച് താരങ്ങൾ ; വിമർശനങ്ങൾക്ക് മറുപടിയുമായി വീണയും അശ്വതിയും
തന്റെ കത്ത് വൈറലായി കാളിദാസ് ഇത് കാണുമെന്നും താരവുമൊത്ത് സെൽഫി എടുക്കാമെന്നുമുള്ള വിസ്മയയുടെ ആഗ്രഹങ്ങളെ കുറിച്ചും കൂട്ടുകാരി ഫേസ്ബുക്കിലൂടെ വിശദീകരിച്ചു.