സര്‍വ്വരും ആകാംഷയോടെ കാത്തിരിക്കുന്ന ദളപതി വിജയ് സിനിമ മാസ്റ്ററിന്‍റെ സെന്‍സറിങ് പൂര്‍ത്തിയായി. ചിത്രത്തിന് യുഎ സര്‍ട്ടിഫിക്കറ്റ് ലഭിച്ച വിവരം സിനിമയുടെ സംവിധായകന്‍ ലോകേഷ് കനകരാജാണ് ട്വിറ്ററിലൂടെ അറിയിച്ചത്. 'ഉടന്‍ തന്നെ കാണാം' എന്നും ലോകേഷ് ട്വീറ്റ് ചെയ്‌തു. ചിത്രം 2021ന്‍റെ തുടക്കത്തില്‍ തിയേറ്ററുകളിലെത്തിക്കാനുള്ള ശ്രമമാണ് നടക്കുന്നത്. കൊവിഡ് മഹാമാരിയാണ് ഈ വര്‍ഷം പകുതിയോടെ തിയേറ്ററുകളിലെത്തേണ്ടിയിരുന്ന സിനിമയ്ക്ക് വിലങ്ങ് തടിയായത്. മാസ്റ്റര്‍ ഒടിടി പ്ലാറ്റ്‌ഫോമുകളില്‍ റീലിസ് ചെയ്യുമെന്ന തരത്തില്‍ പലതവണ റിപ്പോര്‍ട്ടുകള്‍ വന്നിരുന്നുവെങ്കിലും അണിയറപ്രവര്‍ത്തകര്‍ വാര്‍ത്തകള്‍ നിഷേധിച്ചിരുന്നു.
'മാസ്റ്ററി'ന് യുഎ സര്‍ട്ടിഫിക്കറ്റ്
യുഎ സര്‍ട്ടിഫിക്കറ്റ് ലഭിച്ച വിവരം സിനിമയുടെ സംവിധായകന്‍ ലോകേഷ് കനകരാജാണ് ട്വിറ്ററിലൂടെ അറിയിച്ചത്.
'മാസ്റ്ററി'ന് യുഎ സര്‍ട്ടിഫിക്കറ്റ്
വിജയ് കോളജ് അധ്യാപകനായി എത്തുന്ന ചിത്രത്തില്‍ വമ്പന്‍ താരനിരയാണ് അണിനിരക്കുന്നത്. മക്കള്‍ സെല്‍വന്‍ വിജയ് സേതുപതിയാണ് ചിത്രത്തില്‍ ദളപതിയുടെ വില്ലന്‍. മാളവിക മോഹനാണ് നായിക. ചിത്രത്തിലെ ഇതുവരെ ഇറങ്ങിയ ടീസറും ഗാനങ്ങളും പോസ്റ്ററുകളും ഹിറ്റായിരുന്നു. മാനഗരം, കൈതി എന്നീ ചിത്രങ്ങള്‍ക്ക് ശേഷം ലോകേഷ് കനകരാജ് സംവിധാനം ചെയ്യുന്ന ചിത്രം കൂടിയാണ് മാസ്റ്റര്‍. എക്സ്ബി ക്രിയേറ്ററിന്‍റെ ബാനറിൽ സേവ്യർ ബ്രിട്ടോയാണ് ചിത്രത്തിന്‍റെ നിര്‍മാണം. സംഗീതം ഒരുക്കിയിരിക്കുന്നത് അനിരുദ്ധ് രവിചന്ദറാണ്.
വിജയ്‌യുടെതായി അണിയറയില്‍ ഒരുങ്ങുന്ന മറ്റൊരു ചിത്രം ദളപതി 65 ആണ്. സിനിമ സംവിധാനം ചെയ്യുന്നത് നെല്‍സണ്‍ ദിലീപ് കുമാറാണ്. പേര് പ്രഖ്യാപിച്ചിട്ടില്ലാത്ത സിനിമ നിര്‍മിക്കുന്നത് സണ്‍ പിക്ചേഴ്‌സാണ്. സര്‍ക്കാറാണ് ഇതിന് മുമ്പ് സണ്‍ പിക്‌ചേഴ്‌സ് നിര്‍മിച്ച വിജയ് സിനിമ. വിജയ്‌യും നെല്‍സണ്‍ ദിലീപ് കുമാറും ഒന്നിക്കുന്ന ആദ്യ സിനിമ കൂടിയായിരിക്കും ദളപതി 65. കൊലമാവ് കോകില എന്ന നയന്‍താര ചിത്രത്തിന്‍റെ സംവിധായകനാണ് നെല്‍സണ്‍ ദിലീപ് കുമാര്‍.