മലയാളത്തിനൊപ്പം തമിഴിലും ഒരേസമയം നിർമിച്ച ത്രില്ലർ ഡ്രാമ ചിത്രമാണ് 'അദൃശ്യം'. നവാഗതനായ സാക് ഹാരിസ് സംവിധാനം ചെയ്യുന്ന ദ്വിഭാഷ ചിത്രത്തിന്‍റെ ടൈറ്റിലും മോഷന്‍ പോസ്റ്ററും പുറത്തുവിട്ടു. നടൻ ടൊവിനോ തോമസാണ് ഫേസ്ബുക്ക് പേജിലൂടെ മോഷൻ പോസ്റ്റർ റിലീസ് ചെയ്‌തത്.
മലയാളത്തിൽ ജോജുവും നരേനും ഷറഫുദ്ദീനും
മലയാളത്തിൽ അദൃശ്യം എന്ന ടൈറ്റിലിൽ ഒരുങ്ങുന്ന ചിത്രത്തിന് 'യുകി' എന്നാണ് തമിഴിൽ പേര്. ജോജു ജോര്‍ജ്, നരേന്‍, ഷറഫുദ്ദീന്‍ എന്നിവരാണ് മലയാളത്തിൽ പ്രധാന കഥാപാത്രങ്ങളായി എത്തുന്നത്. പരിയേറും പെരുമാള്‍ ചിത്രത്തിലൂടെ പ്രശസ്‌തനായ കതിർ, നരേന്‍, നട്ടി നടരാജന്‍ എന്നിവർ യുകിയിൽ മുഖ്യതാരങ്ങളാകുന്നു.
കായല്‍ ആനന്ദി, പവിത്ര ലക്ഷ്‌മി, ആത്മീയ രാജന്‍, പ്രതാപ് പോത്തന്‍, ജോണ്‍ വിജയ്, മുനിഷ്‌കാന്ത്, സിനില്‍ സൈന്‍യുദീന്‍ വിനോദിനി, അഞ്ജലി റാവു, ബിന്ദു സഞ്ജീവ് എന്നിവർ മലയാളത്തിലും തമിഴിലും പ്രധാനകഥാപാത്രങ്ങളെ അവതരിപ്പിക്കുന്നു.
പാക്ക്യരാജ് രാമലിംഗം ആണ് ചിത്രത്തിന്‍റെ തിരക്കഥാകൃത്ത്. പുഷ്‌പരാജ് സന്തോഷ് ഛായാഗ്രഹണം നിർവഹിച്ചിരിക്കുന്ന ചിത്രത്തിന്‍റെ എഡിറ്റർ ആശിഷ് ജോസഫാണ്. സിനിമയുടെ പശ്ചാത്തല സംഗീതം ഒരുക്കുന്നത് ഡോൺ വിൻസന്‍റും ഗാനങ്ങൾ ചിട്ടപ്പെടുത്തിയിരിക്കുന്നത് രഞ്ജിൻ രാജുമാണ്.
More Read: 'തലയും ദളപതിയും' കണ്ടുമുട്ടി; ആഘോഷമാക്കി ആരാധകര്‍
ഫോറന്‍സിക്, കള എന്നീ സൂപ്പര്‍ ഹിറ്റ് ചിത്രങ്ങളൊരുക്കിയ ജുവിസ് പ്രൊഡക്ഷന്‍റെയും യുഎഎന്‍ ഫിലിം ഹൗസ്, എഎഎ ആര്‍ പ്രൊഡക്ഷന്‍സ് എന്നീ ബാനറുകളിലുമാണ് ബിഗ് ബജറ്റ് ചിത്രം നിർമിച്ചിരിക്കുന്നത്.
