കടലില്‍ നീന്തി തെരുവുനായയെ രക്ഷിച്ച് പ്രണവ് മോഹന്‍ലാല്‍ ; വീഡിയോ

കടലിൽ അകപ്പെട്ട തെരുവുനായയെ രക്ഷിക്കുന്ന പ്രണവിന്‍റെ വീഡിയോ സമൂഹമാധ്യമങ്ങളില്‍ വൈറല്‍

സൂപ്പർതാരത്തിന്‍റെ മകൻ എന്ന പരിവേഷങ്ങളില്‍ അഭിരമിക്കാതെ യാത്രകളുടെ ലോകത്താണ് പ്രണവ് മോഹൻലാൽ. റിയൽ ലൈഫിലെ ചാർലി എന്നാണ് സമൂഹമാധ്യമങ്ങളിൽ താരത്തെ ആരാധകർ വിശേഷിപ്പിക്കാറുള്ളത്. കുറച്ചുദിവസങ്ങൾക്ക് മുൻപ് മണാലിയിൽവച്ചുള്ള പ്രണവിന്‍റെ വീഡിയോ വൈറലായിരുന്നു.

മണാലിയിൽ വച്ച് താരത്തെ കണ്ടുമുട്ടിയ ആരാധകർ വീഡിയോയില്‍ പകർത്തുമ്പോഴേക്കും അവിടെ നിന്നും പ്രണവ് നടന്നകലുന്നതും കാണാം. എന്നാൽ, ഇപ്പോൾ സമൂഹമാധ്യമങ്ങളിൽ ഇടംപിടിക്കുന്നത് പ്രണവിന്‍റെ രക്ഷാപ്രവർത്തനത്തിന്‍റെ വീഡിയോയാണ്. കടലിൽ അകപ്പെട്ട തെരുവുനായയെ നീന്തിപ്പോയി രക്ഷിക്കുകയായിരുന്നു പ്രണവ്.

കടലിലൂടെ നീന്തി വരുന്ന പ്രണവിന്‍റെ കയ്യിലൊരു തെരുവ് നായയുള്ളതായി ദൃശ്യങ്ങളിൽ കാണാം. ശേഷം നായയെ മറ്റ് നായകൾക്കൊപ്പം വിട്ടശേഷം പ്രണവ് നടന്നുപോകുന്നു.

യുവനടനെ അഭിനന്ദിച്ച് സമൂഹമാധ്യമങ്ങളില്‍ പ്രശംസ നിറയുകയാണ്. പ്രണവിന്‍റെ മാനുഷികതയെ അഭിനന്ദിച്ച് നിരവധി പേര്‍ വീഡിയോ പങ്കുവച്ചു. പ്രണവ് മോഹൻലാലിന്‍റേതായി റിലീസിനൊരുങ്ങുന്ന പുതിയ ചിത്രങ്ങൾ പ്രിയദർശന്‍റെ മരക്കാർ: അറബിക്കടലിന്‍റെ സിംഹം, ഹൃദയം എന്നിവയാണ്.