ഇന്ത്യൻ പ്രേക്ഷകരുടെ ഏറ്റവും ജനപ്രിയ വെബ് സീരീസുകളിലൊന്നായ മണി ഹീസ്റ്റ് അഞ്ചാം സീസണിന്‍റെ ചിത്രീകരണം പൂർത്തിയായി. ഇംഗ്ലീഷ് ഭാഷയിലല്ലാത്ത ഏറ്റവും കൂടുതൽ കാഴ്ചക്കാരുള്ള നെറ്റ്ഫ്ലിക്സ് സീരീസ് ഷൂട്ടിങ് പൂർത്തിയായതോടെ ഈവര്‍ഷം അവസാനത്തോടെ പ്രദർശനത്തിനെത്തുമെന്നാണ് സൂചന.
'പത്ത് എപ്പിസോസുകളിലായി ഒരുക്കുന്ന അഞ്ചാമത്തെയും അവസാനത്തെയും സീസണിന്‍റെ ചിത്രീകരണം പൂർത്തിയായി. ഒരു കൊള്ളയിൽ നിന്നും ആരംഭിച്ച മണി ഹീസ്റ്റ് ഇപ്പോൾ ഒരു കുടുംബമാണെന്നും' നെറ്റ്ഫ്ലിക്സ് അറിയിച്ചു. ഒപ്പം, സെറ്റിൽ നിന്നുള്ള ലൊക്കേഷൻ ചിത്രങ്ങളും നെറ്റ്ഫ്ലിക്സ് പങ്കുവച്ചിട്ടുണ്ട്.
More Read: പ്രൊഫസറും സംഘവും അവസാന വരവിനൊരുങ്ങുന്നു
സംഘർഷഭരിതമായ എപ്പിസോഡുകളാണ് അവസാന സീരീസിലുള്ളത്. കഴിഞ്ഞ ഓഗസ്റ്റ് മുതൽ അഞ്ചാം സീസണിന്‍റെ ചിത്രീകരണം ആരംഭിച്ചിരുന്നു. ഈ വർഷം ഏപ്രിൽ- മെയ് മാസങ്ങളിലായി റിലീസ് ചെയ്യുമെന്ന് തീരുമാനിച്ചിരുന്നെങ്കിലും കൊവിഡ് പശ്ചാത്തലത്തിൽ ചിത്രീകരണം നിർത്തിവയ്‌ക്കേണ്ടതായും വന്നു. പേപ്പർ ഹൗസ് എന്ന് അർഥം വരുന്ന ലാ കാസ ഡി പാപ്പല്‍ പേരിലാണ് 2017ൽ സ്പാനിഷ് സീരീസിന്‍റെ ആദ്യ സീസൺ എത്തിയത്. ടെലിവിഷനിലൂടെ സീരീസ് റിലീസ് ചെയ്തതും ഇതേ പേരിലായിരുന്നു.
പിന്നീട് സീരീസ് നെറ്റ്ഫ്‌ളിക്‌സ് ഏറ്റെടുത്ത്‌ ഇംഗ്ലീഷ് ഭാഷയിൽ പുറത്തിറക്കുകയും പ്രൊഫസറും കൂട്ടരും വൻ ജനപ്രീതിയാര്‍ജിക്കുകയുമായിരുന്നു.
