'പക്ഷേ ചില മഴകളുണ്ട്, പെയ്തൊഴിഞ്ഞാലും മരച്ചില്ലകളിലും ജാലകച്ചില്ലുകളിലും തുള്ളികളായി ഓർമകളെ വിട്ടുപോകുന്നവ, ഓർമകളിൽ മിന്നലുകളെ ബാക്കിവയ്ക്കുന്നവ, തോർന്നുതീർന്നാലും കാതുകളിൽ പെയ്‌തുതീരാത്ത സംഗീതമാകുന്നവ... പ്രിയ ലോഹി സാർ പ്രണാമം...'
12 ആണ്ട് മുന്‍പ് അപ്രതീക്ഷിതമായി വിടവാങ്ങിയ മലയാളത്തിന്‍റെ പ്രിയപ്പെട്ട ലോഹിതദാസിന്‍റെ ഓർമകളിൽ ആദരവ് അർപ്പിച്ച് മലയാള സിനിമാലോകം. ഫെഫ്‌കയുടെ സംവിധായക കൂട്ടായ്‌മയും എഴുത്തുകാരുടെ കൂട്ടായ്‌മയും തങ്ങളുടെ പ്രിയഗുരുവിന്‍റെ സ്നേഹസ്മരണ പങ്കുവച്ചു.
ഒന്നുമല്ലാതിരുന്നപ്പോൾ തനിക്കെങ്ങനെയായിരുന്നു മഴയെന്നതും, വളർച്ചയിൽ പൂമുഖപ്പടിയിൽ കണ്ട മഴയെ കുറിച്ചും ലോഹിതദാസ് പറഞ്ഞ വാക്കുകൾ ഉൾപ്പെടുത്തിയാണ് ഫെഫ്ക റൈറ്റേഴ്‌സ് യൂണിയൻ അദ്ദേഹത്തിന്‍റെ സ്മരണാർഥം വീഡിയോ ഒരുക്കിയത്.
1.41 മിനിറ്റ് ദൈർഘ്യമുള്ള വീഡിയോയ്ക്ക് ശബ്‌ദവിവരണം നൽകിയിരിക്കുന്നത്, കാരിരുമ്പിന്‍റെ കരുത്തുള്ള ഭാനുവിന് ജീവൻ പകർന്ന മഞ്ജു വാര്യരാണ്. 'മഹാഗുരുവിന് സ്മരണകളുടെ മഴനാരുകളാൽ അർച്ചന'യെന്ന് കുറിച്ചുകൊണ്ടാണ് ഫെഫ്ക വീഡിയോ സമൂഹമാധ്യമങ്ങളിൽ പങ്കുവച്ചത്.
സ്മരാണഞ്ജലി അർപ്പിച്ച് താരങ്ങളും
സൂപ്പർതാരങ്ങളായ മമ്മൂട്ടി, മോഹൻലാൽ, പൃഥ്വിരാജ്, മഞ്ജു വാര്യർ തുടങ്ങി നിരവധി പ്രമുഖർ ലോഹിതദാസിന് ഫേസ്ബുക്കിൽ സ്മരാണഞ്ജലി കുറിച്ചു.
മോഹൻലാലും മമ്മൂട്ടിയും തങ്ങളുടെ പ്രിയപ്പെട്ട കഥാകാരനും സംവിധായകനുമായ ലോഹിതദാസിന് ഓർമപ്പൂക്കൾ അർപ്പിച്ചപ്പോൾ കന്മദത്തിലെ ലൊക്കേഷൻ ചിത്രം പങ്കുവച്ചുകൊണ്ടാണ് മഞ്ജു വാര്യർ സ്മരണ കുറിച്ചത്.