പ്രതിഫലം ഇല്ലാതെ സിനിമയെടുത്ത് കൂടെയുള്ളവർക്ക് കൈത്താങ്ങാകാമെന്ന് ഫെഫ്‌കയോട് ഷിബു ജി. സുശീലൻ

പ്രതിഫലം ഇല്ലാതെ ബിസിനസ് സാധ്യതയുള്ള ആർട്ടിസ്റ്റുകളെയും സാങ്കേതികവിദഗ്‌ധരെയും ഉൾപ്പെടുത്തി ഒരു സിനിമ എടുക്കാമെന്നും, ഒടിടി പ്ലാറ്റ്‌ഫോമിലൂടെ പ്രദർശനത്തിനെത്തിച്ച് ലഭിക്കുന്ന തുക സിനിമാമേഖലയിലെ അടിസ്ഥാന തൊഴിലാളികൾക്ക് നൽകാമെന്നും സെവന്ത് ഡേ ചിത്രത്തിന്‍റെ നിർമാതാവ് ഷിബു ജി. സുശീലൻ പറഞ്ഞു.

കൊവിഡ് കാലത്ത് അടിസ്ഥാന തൊഴിലാളികളായുള്ള സിനിമാപ്രവർത്തകരെ സഹായിക്കുന്നതിനായി ഫെഫ്‌ക ഒരു സിനിമയെടുക്കാൻ മുന്നോട്ടുവരണമെന്ന് ദേശീയ അവാർഡ് ജേതാവ് കൂടിയായ നിർമാതാവ് ഷിബു ജി. സുശീലൻ. പ്രതിഫലം ഇല്ലാതെ ബിസിനസ് സാധ്യതയുള്ള ആർട്ടിസ്റ്റുകളെയും സാങ്കേതികവിദഗ്‌ധരെയും ഉൾപ്പെടുത്തികൊണ്ട് സിനിമ എടുക്കണമെന്ന് നിർമാതാവ് ഫേസ്ബുക്കിലൂടെ വിശദീകരിച്ചു.

"ഏറ്റവും നല്ല ഏഴ് കഥകൾ കോർത്തിണക്കി 7 സംവിധായകർ,7 കാമറമാന്മാർ,7 എഡിടറ്റേഴ്‌സ്7 മ്യൂസിക്‌ ഡയറക്ടറ്റേഴ്‌സ്..." ഒരേ സമയം പല സ്ഥലങ്ങളിൽ 7 യൂണിറ്റ് ടീമിനെ വച്ച് മികച്ച ആർട്ടിസ്റ്റുകളെ ഉൾപ്പെടുത്തി അഞ്ചോ ഏഴോ ദിവസങ്ങൾക്കുള്ളിൽ സിനിമ ചിത്രീകരിക്കാമെന്നും അദ്ദേഹം പറഞ്ഞു.

കൊവിഡ് കാലത്ത് ജോലി ഇല്ലാതിരിക്കുമ്പോഴും അത്യവശ്യ ഘട്ടങ്ങളിലും കുട്ടികളുടെ പഠനം, മരുന്ന്, ആഹാരസാധനങ്ങൾ എന്നിവയ്ക്ക് സഹപ്രവർത്തരെ സഹായിക്കുന്നതിനുള്ള മാർഗമാണ് ഷിബു ജി. സുശീലൻ വ്യക്തമാക്കിയത്. ഈ സിനിമ ഉടനെ നടന്നാൽ പ്രമുഖ ഒടിടി പ്ലാറ്റ്‌ഫോമിൽ റിലീസിനെത്തിച്ച് അതിലൂടെ ലഭിക്കുന്ന പണം നമ്മുടെ കൂടെ ഉള്ളവരുടെ ജീവിതം മുന്നോട്ടുകൊണ്ടുപോകാൻ വേണ്ടി സഹായിക്കുമെന്നും സെവന്ത് ഡേ ചിത്രത്തിന്‍റെ നിർമാതാവ് ഷിബു ജി. സുശീലൻ പറഞ്ഞു.