ആഷിക് അബു, വേണു, ജയ് കെ. എന്നിവരുടെ സംവിധാനത്തിൽ ഒരുങ്ങുന്ന 'ആണും പെണ്ണും' എന്ന ആന്തോളജി ചിത്രത്തിന്റെ റിലീസ് തിയതി പുറത്തുവിട്ടു. ഈ മാസം 26ന് ചിത്രം റിലീസ് ചെയ്യും. ചിത്രത്തിന്റെ മോഷന് പോസ്റ്റര് പുറത്തുവിട്ടുകൊണ്ടാണ് റിലീസ് പ്രഖ്യാപിച്ചത്. റോഷന് മാത്യു, ദര്ശന രാജേന്ദ്രന്, പാര്വതി, ആസിഫ് അലി, ജോജു ജോർജ്, സംയുക്ത മേനോൻ എന്നിവരാണ് ആന്തോളജിയിലെ പ്രധാന താരങ്ങൾ.
മൂന്ന് കഥകളെ ആസ്പദമാക്കി തയ്യാറാക്കുന്ന ആന്തോളജിയിൽ ആഷിക് അബു സംവിധാനം ചെയ്യുന്ന ചിത്രത്തിന്റെ രചന നിർവഹിച്ചിരിക്കുന്നത് ഉണ്ണി ആറാണ്. ചെറുക്കനും പെണ്ണും എന്ന ടൈറ്റിലിൽ ഒരുങ്ങുന്ന ചിത്രത്തിൽ റോഷന് മാത്യു, ദര്ശന രാജേന്ദ്രൻ താരങ്ങൾക്ക് പുറമെ നെടുമുടി വേണു, കവിയൂര് പൊന്നമ്മ, ബേസില് ജോസഫ് എന്നിവരും നിർണായകവേഷങ്ങൾ ചെയ്യുന്നു. ഷൈജു ഖാലിദ് ഛായാഗ്രഹകനാകുന്ന ചിത്രത്തിന്റെ എഡിറ്റർ സൈജു ശ്രീധരനാണ്.