കമൽ ഹാസൻ ചിത്രം വിക്രത്തിലെ ആക്ഷൻ രംഗങ്ങൾ ഒരുക്കുന്നത് പ്രശസ്‌ത സംഘട്ടന സംവിധായകരായ അൻപറിവ് മാസ്റ്റേഴ്‌സ്. ശങ്കറിന്‍റെ ഇന്ത്യന്‍ 2വിന് ശേഷം കമല്‍ ഹാസന്‍ നായകനാകുന്ന ചിത്രം സംവിധാനം ചെയ്യുന്നത് ലോകേഷ് കനകരാജ് ആണ്.
സംവിധായകന്‍റെ കൈതിയിലെ സ്റ്റണ്ട് കൊറിയോഗ്രാഫേഴ്‌സായ അൻപറിവ് എന്ന ഇരട്ട സഹോദരങ്ങൾ തന്നെയാണ് 'വിക്ര'ത്തിലും സംഘട്ടന രംഗങ്ങൾ ഒരുക്കുന്നതെന്ന വാർത്ത ലോകേഷ് കനകരാജ് തന്നെയാണ് സമൂഹമാധ്യമങ്ങളിലൂടെ അറിയിച്ചത്.
'അൻപറിവിന് സ്വാഗതം' എന്ന് കുറിച്ചുകൊണ്ട് കമൽഹാസന്‍, അന്‍പുമണി, അറിവുമണി ഇരട്ട സഹോദരങ്ങൾ എന്നിവര്‍ക്കൊപ്പമുള്ള ചിത്രം അദ്ദേഹം പോസ്റ്റിനൊപ്പം പങ്കുവച്ചിട്ടുണ്ട്. കെജിഎഫ് എന്ന ചിത്രത്തിലൂടെ ദേശീയ അവാർഡ് ജേതാക്കളായ സ്റ്റണ്ട് കൊറിയോഗ്രാഫർമാരാണ് അൻപറിവ് മാസ്റ്റേഴ്‌സ്.