സംവിധായകനും തിരക്കഥാകൃത്തുമായ സച്ചിയുടെ വേര്‍പാടിന് ഒരു വര്‍ഷം പൂര്‍ത്തിയാകുമ്പോള്‍ അകാലത്തില്‍ പൊലിഞ്ഞ പ്രിയ സുഹൃത്തിനെ അനുസ്‌മരിക്കുകയാണ് സിനിമാലോകത്തെ സച്ചിയുടെ സുഹൃത്തുക്കളും സഹപ്രവര്‍ത്തകരും.
സച്ചിയേ ഓര്‍ത്ത് പ്രിയപ്പെട്ടവര്‍
സച്ചിക്കൊപ്പം നില്‍ക്കുന്ന ഒരു ബ്ലാക്ക് ആന്‍ഡ് വൈറ്റ് ഫോട്ടോ പങ്കുവെച്ചുകൊണ്ട് പൃഥ്വിരാജ് ഓര്‍മകുറിപ്പ് പങ്കുവെച്ചത്. 'പൊട്ടിച്ചിരികള്‍, ആശയങ്ങള്‍, കഥകള്‍, വിശ്വാസം. സച്ചി... ഒരാണ്ട്' എന്നായിരുന്നു പൃഥ്വിരാജിന്‍റെ വാക്കുകള്‍. സച്ചിയുടെ സിനിമകളില്‍ ഏറ്റവും കൂടുതല്‍ നായകനായിട്ടുള്ള നടനാണ് പൃഥ്വിരാജ്. സച്ചിയുമായി വളരെയധികം ആത്മബന്ധവും പൃഥ്വിക്കുണ്ടായിരുന്നു. 23 വര്‍ഷത്തിനിടെ തന്നെ ഏറ്റവും അധികം ഉലച്ച മരണം സച്ചിയുടേതായിരുന്നുവെന്ന് പൃഥ്വിരാജ് ഒരിക്കല്‍ പറഞ്ഞിട്ടുണ്ട്.
'സച്ചി സാര്‍ പോയിട്ട് ഇന്നേക്ക് ഒരു വര്‍ഷമാകുന്നു. 'അയ്യപ്പനും കോശിയും' എന്ന സിനിമയിലൂടെ എനിക്കും നഞ്ചമ്മചേച്ചിക്കും വലിയ അവസരങ്ങള്‍ നല്‍കിയ, അട്ടപ്പാടി എന്ന ഭൂപ്രദേശത്തെ വെള്ളിത്തിരയില്‍ അനശ്വരമാക്കിയ ആ വലിയ മനുഷൃന്‍റെ ഓര്‍മകള്‍ക്ക് മുന്നില്‍ ഞങ്ങള്‍ ശിരസ് കുനിക്കുന്നു. സ്മരണാജ്ഞലികള്‍' നഞ്ചിയമ്മക്ക് വേണ്ടി പഴനിസ്വാമി കുറിച്ചു. അയ്യപ്പനും കോശിയും ചിത്രത്തിലെ ഗാനങ്ങള്‍ ആലപിച്ച് പ്രശസ്തയായ ഗായികയാണ് നഞ്ചിയമ്മ.
'എല്ലായ്‌പ്പോഴും എന്‍റെ ചിന്തയില്‍... എന്നെന്നേക്കുമായി എന്‍റെ ഹൃദയത്തിൽ... എന്‍റെ ആത്മാവ്‌... എന്‍റെ പ്രിയപ്പെട്ട സച്ചി... എന്‍റെ സുഹൃത്ത്... മിസ് യു സച്ചി' എന്നാണ് ബിജു മേനോന്‍ കുറിച്ചത്. അയ്യപ്പനും കോശിയും എന്ന സിനിമയില്‍ അയ്യപ്പന് ജീവന്‍ നല്‍കിയത് ബിജു മേനോനായിരുന്നു.