ദക്ഷിണേന്ത്യ മുഴുവൻ ആരാധകരുള്ള ചിയാൻ വിക്രമും മകൻ ധ്രുവ് വിക്രമും ആദ്യമായി സ്‌ക്രീനിൽ ഒന്നിച്ചെത്തുന്നു എന്നതിനാൽ 'മഹാൻ' എന്ന ചിത്രത്തിനായി വളരെ പ്രതീക്ഷയിലാണ് തമിഴകം. യുവസംവിധായകരിൽ പ്രമുഖനായ കാർത്തിക് സുബ്ബരാജ് സംവിധാനം ചെയ്യുന്ന തമിഴ് ചിത്രത്തിലെ ആദ്യ ഗാനം ബുധനാഴ്‌ച വൈകുന്നേരം റിലീസ് ചെയ്‌തിരുന്നു.
'എ കാർത്തിക് സുബ്ബരാജ് പട'ത്തിൽ വിക്രമിനൊപ്പം ധ്രുവും
തമിഴ് ഡപ്പാംകൂത്ത് ശൈലിയിൽ ഒരുക്കിയിരിക്കുന്ന വീഡിയോ ഗാനം റിലീസ് ചെയ്‌ത് മണിക്കൂറുകൾ പിന്നിടുമ്പോൾ, ഒരു മില്യൺ കാഴ്‌ചക്കാരെ സ്വന്തമാക്കി ഗാനം ട്രെൻഡിങ്ങിൽ ഇടംപിടിച്ചിരിക്കുകയാണ്. തമിഴകത്തിന്‍റെ പ്രമുഖ സംഗീതജ്ഞൻ സന്തോഷ് നാരായണനാണ് ഗാനം ചിട്ടപ്പെടുത്തിയിരിക്കുന്നത്. വി.എം മഹാലിംഗം, സന്തോഷ് നാരായണൻ എന്നിവരാണ് 'സൂരയാട്ടം' എന്നു തുടങ്ങുന്ന ഗാനം ആലപിച്ചിരിക്കുന്നത്. മുതമിൽ ആണ് പാട്ടിലെ വരികൾ എഴുതിയിരിക്കുന്നത്.
വിക്രമും മകനും കേന്ദ്രകഥാപാത്രങ്ങളാകുന്ന ചിത്രത്തിൽ സിമ്രാനാണ് നായിക. ശ്രേയാസ് കൃഷ്‌ണ ചിത്രത്തിനായി ഫ്രെയിമുകൾ തയ്യാറാക്കിയിരിക്കുന്നു. വിവേക് ഹർഷനാണ് മഹാൻ ചിത്രത്തിന്‍റെ എഡിറ്റർ. എസ്.എസ് ലളിത് കുമാറാണ് 'കാർത്തിക് സുബ്ബരാജ് പട'ത്തിന്‍റെ നിർമാതാവ്.