ടൊവിനോ തോമസ് നായകനാവുന്ന പുതിയ ചിത്രം കൽക്കിയുടെ ചിത്രീകരണം ആരംഭിച്ചു. മമ്മൂട്ടിയുടെ സൂപ്പർഹിറ്റ് കഥാപാത്രങ്ങളിലൊന്നായ ഇൻസ്പെക്ടർ ബൽറാമിൽ നിന്നും പ്രചോദനമുൾക്കൊണ്ട പൊലീസ് കഥാപാത്രമായാണ് ടൊവിനോ ചിത്രത്തിൽ എത്തുന്നത് എന്നാണ് റിപ്പോർട്ട്. നവാഗതനായ പ്രവീൺ പ്രഭാറാം ആണ് ചിത്രത്തിന്‍റെ സംവിധായകൻ. ടൊവിനോ തന്നെയാണ് പൂജാ ചടങ്ങിന്‍റെ ചിത്രങ്ങൾ സമൂഹമാധ്യമങ്ങളിലൂടെ ആരാധകരുമായി പങ്കുവച്ചിരിക്കുന്നത്. എന്നാൽ ചിത്രത്തിന്‍റെ കഥയെക്കുറിച്ചോ അഭിനേതാക്കളെക്കുറിച്ചോ കൂടുതൽ വിശദാംശങ്ങളൊന്നും അണിയറപ്രവർത്തകർ ഇതുവരെ പുറത്തുവിട്ടിട്ടില്ല. സുജിൻ സുജാതനും പ്രവീൺ പ്രഭാറാമും ചേർന്നാണ് കൽക്കിയുടെ തിരക്കഥ ഒരുക്കിയിരിക്കുന്നത്. ചിത്രത്തിന്‍റെ ഛായാഗ്രഹണം ഗൗതം ശങ്കറും സംഗീതസംവിധാനം ജേക്ക്സ് ബിജോയും നിർവഹിക്കും. ലിറ്റിൽ ബിഗ് ഫിലിംസിന്‍റെ ബാനറിൽ സുവിൻ കെ കൃഷ്ണനും പ്രശോഭ് കൃഷ്ണയും ചേർന്നാണ് ചിത്രം നിർമ്മിക്കുന്നത്.