എൽസയും അന്നയും വീണ്ടുമെത്തുന്നു; ഫ്രോസൺ- 2 നവംബർ 22ന്

വാള്‍ട്ട് ഡിസ്‌നി പിക്‌ചേഴ്‌സിന്‍റെ ഫ്രോസണ്‍ എന്ന 3-ഡി ചിത്രത്തിന്‍റെ രണ്ടാം ഭാഗം രണ്ടാഴ്‌ചക്കകം തീയേറ്ററിലെത്തും

വാള്‍ട്ട് ഡിസ്‌നിയുടെ എക്കാലത്തെയും മികച്ച ചിത്രമായിരുന്നു 2013ൽ ഇറങ്ങിയ ഫ്രോസണ്‍. ഡിസ്‌നിയുടെ 53-ാം ആനിമേഷൻ ചിത്രം മികച്ച ആനിമേഷൻ സിനിമക്കും മികച്ച ഗാനത്തിനുമുള്ള ഓസ്‌കാറും നേടിയിരുന്നു. ആറു വർഷത്തിന് ശേഷം ആദ്യഭാഗമിറങ്ങിയ അതേ മാസം ചിത്രത്തിന്‍റെ രണ്ടാം ഭാഗവുമെത്തുന്നു.
ജെന്നിഫര്‍ ലീയും ക്രിസ് ബക്കും ചേർന്ന് സംവിധാനം ചെയ്യുന്ന ഫ്രോസണ്‍- 2 ഈ മാസം 22നെത്തും. ചിത്രത്തിലെ പുതിയ പോസ്റ്റർ റിലീസ് ചെയ്തു.

രണ്ട് സഹോദരിമാരുടെ ആത്മബന്ധമായിരുന്നു ഫ്രോസണിലൂടെ പറഞ്ഞത്. രണ്ടാം ഭാഗത്തിൽ എല്‍സയുടെ മാന്ത്രികശക്തിയുടെ ഉത്ഭവം കണ്ടെത്തുന്നതും അവരുടെ രാജ്യം സംരക്ഷിക്കുന്നതിനായി തങ്ങളുടെ ജന്മനാടായ അരെന്‍ഡെല്ലെക്കപ്പുറം ഒരു പുതിയ യാത്ര ആരംഭിക്കുന്നതുമാണ് കഥ. ആദ്യ ഭാഗത്തിലെ കഥാപാത്രങ്ങൾ തന്നെയാണ് രണ്ടാം ഭാഗത്തിലും ശബ്‌ദം നല്‍കുന്നത്. അന്നയ്ക്ക് ക്രിസ്റ്റെന്‍ ബെല്ലും ഒലാഫിന് ജോഷ് ഗാദും ക്രസ്റ്റോഫിന് ജൊനാഥന്‍ ഗ്രോഫുമാണ് ശബ്‌ദം നല്‍കിയിരിക്കുന്നത്.