ബോളിവുഡ് സുന്ദരി യാമി ഗൗതം വിവാഹിതയായി. പൃഥ്വിരാജ് ചിത്രം ഹീറോയിലൂടെ മലയാളിക്ക് സുപരിചിതയാണ് യാമി. വിക്കി കൗശല്‍ ചിത്രം ഉറി ദി സര്‍ജിക്കല്‍ സ്ട്രൈക്കിന്‍റെ സംവിധായകന്‍ ആദിത്യ ധര്‍ ആണ് വരന്‍. സോഷ്യല്‍മീഡിയ പേജുകള്‍ വഴിയാണ് വിവാഹിതരായെന്ന വാര്‍ത്ത ഇരുവരും പങ്കുവച്ചത്. അടുത്ത ബന്ധുക്കള്‍ മാത്രമാണ് പങ്കെടുത്തത്. അപ്രതീക്ഷിത വാര്‍ത്തയായതിനാല്‍ ഇരുവരുടെയും വിവാഹ ഫോട്ടോ സോഷ്യല്‍മീഡിയയില്‍ വൈറലാണ്. വിവാഹചിത്രവും യാമിയും ആദിത്യയും പങ്കുവച്ചിട്ടുണ്ട്.
'കുടുംബത്തിന്‍റെ അനുഗ്രഹത്താല്‍ ഞങ്ങള്‍ ഇന്ന് വിവാഹിതരായി. അടുത്ത ബന്ധുക്കള്‍ മാത്രമാണ് പങ്കെടുത്തത്. ഈ സന്തോഷകരമായ നിമിഷം ഞങ്ങളുടെ അടുത്ത കുടുംബാംഗങ്ങളോടൊപ്പം ആഘോഷിച്ചു. സ്‌നേഹത്തിന്‍റെയും സൗഹൃദത്തിന്‍റെയും യാത്ര ആരംഭിക്കുമ്പോള്‍ നിങ്ങളുടെ അനുഗ്രഹങ്ങളും ആശംസകളും ഞങ്ങള്‍ തേടുന്നു....' ഇരുവരും വിവാഹ ചിത്രം പങ്കുവച്ചുകൊണ്ട് കുറിച്ചു. ചുവന്ന നിറത്തിലുള്ള സാരിയും ദുപ്പട്ടയും സ്വര്‍ണാഭരണങ്ങളും അണിഞ്ഞ് പരമ്പരാഗത രീതിയിലാണ് നവവധുവായി യാമി എത്തിയത്. ക്രീം നിറത്തില്‍ ഹെവി വര്‍ക്കുള്ള കുര്‍ത്തയും അതിനോടിണങ്ങുന്ന തലപ്പാവും ഷോളും അണിഞ്ഞാണ് ആദിത്യ എത്തിയത്.