എ.ആറിന്‍റെ 'സ്വദേശ്' ഗാനം പാടി യുഎസ് നാവിക സേന

എ.ആർ റഹ്മാൻ സംഗീതം ഒരുക്കി ആലപിച്ച സ്വദേശ് ചിത്രത്തിലെ ഗാനം യുഎസ് നാവിക സേനാംഗങ്ങൾ അത്താഴ വിരുന്നിൽ പാടിയ വീഡിയോ യുഎസിലെ ഇന്ത്യൻ അംബാസഡർ തരഞ്ചിത് സിംഗ് സന്ധു പങ്കുവച്ചു.

ന്യൂഡൽഹി: "ഒരിക്കലും തകർക്കാൻ പറ്റാത്ത സൗഹൃദമിതാണ്," ഷാരൂഖ് ഖാൻ ചിത്രം 'സ്വദേശി'നായി എ.ആർ റഹ്മാൻ ഒരുക്കിയ ഗാനം യുഎസ് നാവിക സേനാംഗങ്ങൾ അത്താഴ വിരുന്നിൽ പാടി. രാജ്യാതിർത്തികൾ കടന്ന് എആറിന്‍റെ സംഗീതം ആദരിക്കപ്പെടുന്ന വീഡിയോ സമൂഹമാധ്യമങ്ങളും ഏറ്റെടുത്തു. വീഡിയോ ട്വിറ്ററിലൂടെ പങ്കുവച്ചത് യുഎസിലെ ഇന്ത്യൻ അംബാസഡറായ മുതിർന്ന നയതന്ത്രജ്ഞൻ തരഞ്ചിത് സിംഗ് സന്ധുവാണ്. കഴിഞ്ഞ ശനിയാഴ്ച രാത്രി യുഎസ് ചീഫ് നേവൽ ഓപ്പറേഷൻസ് (സിഎൻഒ) മൈക്കൽ എം. ഗിൽഡേക്കൊപ്പം തരഞ്ചിത് സിംഗ് സന്ധു പങ്കെടുത്ത അത്താഴ വിരുന്നിലാണ് സ്വദേശിലെ ഗാനം ആലപിച്ചത്.

തരഞ്ചിത് സിംഗ് സന്ധുവിന്‍റെ ട്വീറ്റിന് സാക്ഷാൽ എ.ആർ റഹ്മാൻ പ്രതികരിച്ചു. സ്വദേശ് എപ്പോഴും വാഴും എന്നാണ് സംഗീത മാന്ത്രികൻ ട്വിറ്ററിലൂടെ പറഞ്ഞത്.

അശുതോഷ് ഗോവാരിക്കർ രചനയും സംവിധാനവും നിർവഹിച്ച ബോളിവുഡ് ചിത്രം സ്വദേശ് 2004ലായിരുന്നു റിലീസ് ചെയ്‌തത്. എ.ആർ റഹ്മാനായിരുന്നു ബോക്സ് ഓഫിസ് ഹിറ്റ് ചിത്രത്തിലെ ഗാനങ്ങൾ ഒരുക്കിയത്.