ചളിയില്‍ കുളിച്ച് സല്‍മാന്‍, ട്രോളില്‍ പൊതിഞ്ഞ് മലയാളീസ്!
പൻവേലിലെ സ്വന്തം ഫാം ഹൗസില്‍ നിന്നും സൽമാൻ പകര്‍ത്തിയ ചിത്രമാണ് കഴിഞ്ഞ ദിവസം സോഷ്യല്‍മീഡിയയില്‍ പങ്കുവെച്ചത്
ബോളിവുഡ് സൂപ്പര്‍താരം സല്‍മാന്‍ ഖാന്‍ പങ്കുവെച്ച പുതിയ ഫോട്ടോയെ ട്രോളി തീര്‍ക്കുകയാണ് മലയാളികള്‍. എല്ലാ കർഷകർക്കും ആദരസൂചകമായി എന്ന അടിക്കുറിപ്പോടെയാണ് ദേഹമാകെ ചെളിയുമായി മണ്ണിലിരിക്കുന്ന ചിത്രം താരം പങ്കുവെച്ചിട്ടുള്ളത്. പൻവേലിലെ സ്വന്തം ഫാം ഹൗസില്‍ നിന്നും സൽമാൻ പകര്‍ത്തിയ ചിത്രമാണിത്. മണിക്കൂറുകള്‍കൊണ്ട് വൈറലായ ഫോട്ടോയ്ക്ക് അനുകൂല കമന്‍റുകളെക്കാളേറെ ലഭിച്ചിരിക്കുന്നത് ട്രോളാണ്. ചിത്രത്തിന് താഴെ ഏറ്റവും കൂടുതല്‍ കമന്‍റുകള്‍ പോസ്റ്റ് ചെയ്തിരിക്കുന്നതും മലയാളികളാണ്. ഫേസ്ബുക്കിലും ട്വിറ്ററിലും ഒരുപോലെയാണ് കമന്‍റുകള്‍ കുമിഞ്ഞുകൂടുന്നത്. മണ്ണുകൊണ്ടുള്ള പുതിയ തെറാപ്പി വല്ലതുമാണോ എന്നും, ഫിസിക്സിലെ നിയമങ്ങൾ നിഷേധിച്ചുകൊണ്ട് സ്റ്റണ്ട് നടത്തുന്ന കർഷകനായാണ് സൽമാൻ പുതിയ ചിത്രത്തിൽ അഭിനയിക്കുന്നതെന്നുമെല്ലാമാണ് ട്രോളുകള്‍ വരുന്നത്. യഥാർഥ കർഷകർക്ക് പോലും താങ്ങാനാവാത്ത ചിത്രമാണിതെന്നും ചിലർ കമന്‍റ് ചെയ്തു.