മുംബൈ:സുശാന്ത് സിംഗ് രജ്‌പുത്തിന്‍റെ മരണത്തിൽ സിബിഐ അന്വേഷണം വേണമെന്ന ആവശ്യവുമായി ബോളിവുഡ് താരങ്ങളായ ശേഖർ സുമൻ, രൂപ ഗാംഗുലി എന്നിവർ രംഗത്ത്. സുശാന്തിന് നീതി ലഭിക്കണമെന്ന ആവശ്യത്തിൽ നടന്‍ ശേഖര്‍ സുമന്‍റെ നേതൃത്വത്തിൽ സമൂഹമാധ്യമങ്ങളിൽ ഫോറം രൂപീകരിച്ചിട്ടുണ്ട്. സിബിഐ അന്വേഷണത്തിന് സര്‍ക്കാരില്‍ ആവശ്യമായ സമ്മർദം ചെലുത്തണമെന്നും നടന്‍ ശേഖര്‍ സുമന്‍ ട്വിറ്ററിലൂടെ വിശദീകരിച്ചു.
"ഞാൻ ജസ്റ്റിസ്ഫോർസുശാന്ത്ഫോറം എന്ന പേരിൽ ഒരു ഫോറം രൂപീകരിച്ചു. സുശാന്തിന്‍റെ മരണത്തിൽ സിബിഐ അന്വേഷണം ആരംഭിക്കണമെന്ന് ആവശ്യപ്പെട്ട് സർക്കാരിൽ സമ്മർദം ചെലുത്താനും സിനിമാലോകത്തെ സ്വേച്ഛാധിപത്യത്തിനും ഗ്രൂപ്പിസത്തിനും മാഫിയക്കും എതിരെ ശബ്ദമുയർത്താനും ഞാൻ എല്ലാവരോടും അഭ്യർത്ഥിക്കുന്നു. നിങ്ങളുടെ പിന്തുണ പ്രതീക്ഷിക്കുന്നു, " എന്നാണ് ശേഖർ സുമൻ ട്വീറ്റ് ചെയ്‌തത്. സമൂഹമാധ്യമങ്ങളിലും ഫോറത്തിന് വലിയ പിന്തുണ ലഭിക്കുന്നുണ്ട്. പിന്തുണച്ചവർക്ക് നന്ദി രേഖപ്പെടുത്തികൊണ്ട് കേസ് നല്ല രീതിയിൽ അവസാനിപ്പിക്കാനായി വേണ്ടത് ചെയ്യുമെന്നും അദ്ദേഹം ട്വിറ്ററിലൂടെ അറിയിച്ചു.