വിജയ് ദേവരകൊണ്ട സിനിമ അര്‍ജുന്‍ റെഡ്ഡി സംവിധാനം ചെയ്‌ത് ശ്രദ്ധനേടിയ സന്ദീപ് റെഡ്ഡി വാംഗ സംവിധാനം ചെയ്യുന്ന ഏറ്റവും പുതിയ ബോളിവുഡ് സിനിമ ആനിമലിന്‍റെ റീലിസ് തിയതി പുറത്തുവിട്ടു. 2022ല്‍ ദസ്റ റിലീസായി സിനിമ പ്രേക്ഷകരിലേക്ക് എത്തുമെന്നാണ് അണിയറപ്രവര്‍ത്തകരും അഭിനേതാക്കളും അറിയിച്ചിരിക്കുന്നത്. രണ്‍ബീര്‍ കപൂര്‍, അനില്‍ കപൂര്‍, പരിണീതി ചോപ്ര എന്നിവരാണ് സിനിമയില്‍ പ്രധാന കഥാപാത്രങ്ങളാകുന്നത്. ബോബി ഡിയോളും ചിത്രത്തില്‍ ഒരു പ്രധാന കഥാപാത്രത്തെ അവതരിപ്പിക്കും.
പുതുവര്‍ഷ ദിനത്തിലാണ് ആനിമല്‍ എന്ന സിനിമയുടെ പ്രഖ്യാപനം അണിയറപ്രവര്‍ത്തകര്‍ നടത്തിയത്. രണ്‍ബീര്‍ കപൂറിന്‍റെ ശബ്ദത്തിലുള്ള ഒരു വീഡിയോ പങ്കുവെച്ചുകൊണ്ടായിരുന്നു സിനിമയുടെ ടൈറ്റില്‍ പ്രഖ്യാപിച്ചത്.
അച്ഛന്‍ മകന്‍ ബന്ധത്തെ കുറിച്ച് രണ്‍ബീര്‍ കപൂര്‍ വിവരിക്കുമ്പോള്‍ പെട്ടന്ന് ഒരു വെടിയൊച്ച കേള്‍ക്കുന്നതും വീഡിയോ അവസാനിക്കുന്നതും കാണാം. അയാന്‍ മുഖര്‍ജിയുടെ ബ്രഹ്മാസ്ത്രയാണ് രണ്‍ബീറിന്‍റെതായി അണിയറയില്‍ ഒരുങ്ങുന്ന മറ്റൊരു സിനിമ. ആലിയ ഭട്ടും രണ്‍ബീറും ആദ്യമായി ഒരുമിച്ച് അഭിനയിക്കുന്ന സിനിമ എന്ന പ്രത്യേകതയും ഈ ചിത്രത്തിനുണ്ട്. ഈ വര്‍ഷം ക്രിസ്മസിന് ചിത്രം റിലീസിനെത്തിയേക്കും.
ബ്രഹ്മാസ്ത്രയില്‍ രണ്‍ബീറിനും ആലിലയ്‌ക്കും പുറമെ അമിതാഭ് ബച്ചന്‍, ഡിംപിള്‍ കപാഡിയ, മൗനി റോയ് എന്നിവരാണ് അഭിനയിക്കുന്നത്. അര്‍ജുന്‍ റെഡ്ഡിയുടെ ഹിന്ദി റീമേക്കായ കബീര്‍ സിങ് സംവിധാനം ചെയ്‌തതും ആനിമലിന്‍റെ സംവിധായകന്‍ സന്ദീപ് ആയിരുന്നു. ഷാഹിദ് കപൂറും കിയാര അധ്വാനിയുമായിരുന്നു നായിക നായകന്മാര്‍.
