ചാരവൃത്തിയാരോപിച്ച് ദേശദ്രോഹിയായ നമ്പി നാരായണൻ; ചരിത്രത്തിൽ മറഞ്ഞിരിക്കുന്ന സത്യം മാധവനിലൂടെ ചുരുളഴിയുകയാണ്. ഐഎസ്ആർഒ ശാസ്‌ത്രജ്ഞൻ നമ്പി നാരായണന്‍റെ ജീവിതത്തെ അടിസ്ഥാനമാക്കി നടൻ ആർ. മാധവൻ സംവിധാനം ചെയ്യുന്ന ചിത്രമാണ് 'റോക്കട്രി: ദി നമ്പി ഇഫക്ട്'. മാധവൻ ആദ്യമായി സംവിധാനം ചെയ്യുന്ന ചിത്രത്തിന്‍റെ ട്രെയിലർ പുറത്തിറങ്ങി.
ചിത്രത്തിൽ നമ്പി നാരായണനായി എത്തുന്നതും മാധവനാണ്. ഇന്ത്യയുടെ അഭിമാനപ്രതീകമായ നമ്പി നാരായണനായുള്ള മാധവന്‍റെ ലുക്ക് നേരത്തെ തന്നെ വലിയ ജനശ്രദ്ധ നേടിയിരുന്നു. ഓർമകളുടെ ഭ്രമണപഥം എന്ന ആത്മകഥയെ അടിസ്ഥാനമാക്കിയാണ് തമിഴിലും ഹിന്ദിയിലും ഇംഗ്ലീഷിലുമായി ചിത്രം ഒരുക്കുന്നത്. മാധവൻ തന്നെയാണ് സിനിമക്ക് തിരക്കഥ ഒരുക്കിയിരിക്കുന്നതും.