മുംബൈ തീരത്തെ കപ്പലിൽ ലഹരിമരുന്ന് വേട്ട; ബോളിവുഡ് സൂപ്പർതാരത്തിന്‍റെ മകനുൾപ്പെടെ കസ്റ്റഡിയിൽ

ബോളിവുഡ് സൂപ്പർതാരത്തിന്‍റെ മകനെ നാർകോട്ടിക്‌സ് കൺട്രോൾ ബ്യൂറോ ചോദ്യം ചെയ്യുന്നു.

മുംബൈ:മുംബൈ തീരത്ത് ആഢംബര കപ്പലിൽ ശനിയാഴ്‌ച നടന്ന ലഹരിമരുന്ന് വേട്ടയില്‍ ബോളിവുഡ് സൂപ്പർസ്റ്റാറിന്‍റെ മകൻ ഉൾപ്പെടെ നിരവധി പേർ എൻസിബി കസ്റ്റഡിയിൽ. താരപുത്രനെ അടക്കം അന്വേഷണസംഘം ചോദ്യം ചെയ്‌തുവരികയാണ്.

കൊക്കെയ്ൻ, ഹാഷിഷ്, എംഡി തുടങ്ങിയ ലഹരി ഉൽപ്പന്നങ്ങൾ ഇവരിൽ നിന്ന് കണ്ടെടുത്തതായാണ് വിവരം. ഗോവയിലേക്ക് പോവുകയായിരുന്ന കോർഡൽ ക്രൂയിസിന്‍റെ 'ദി എംപ്രസ്' എന്ന കപ്പലിൽ വച്ചുനടന്ന പാർട്ടിയിൽ നിന്നാണ് നാർകോട്ടിക്‌സ് കൺട്രോൾ ബ്യൂറോ ലഹരിമരുന്ന് കണ്ടെടുത്തത്. സംഭവത്തിൽ ഒൻപത് പേർക്കെതിരെ അന്വേഷണം നടത്തുകയാണെന്ന് എൻസിബി ഉദ്യോഗസ്ഥർ അറിയിച്ചു.

കഴിഞ്ഞ ആഴ്‌ച മുംബൈ, ഗോവ എന്നിവിടങ്ങളിൽ നിന്നുള്ള അന്വേഷണ സംഘം സംയുക്തമായി നടത്തിയ ഓപ്പറേഷനിൽ ബോളിവുഡ് നടൻ അർജുൻ രാംപലിന്‍റെ പെൺസുഹൃത്ത് ഗബ്രിയേല ഡിമെട്രിയാഡിന്‍റെ സഹോദരനെയും ഒരു ദക്ഷിണാഫ്രിക്കൻ പൗരനെയും അറസ്റ്റ് ചെയ്‌തിരുന്നു.