ന്യൂഡല്‍ഹി: വാട്‌സ്‌ആപ്പില്‍ പുതിയ ഫീച്ചറുകള്‍ പ്രഖ്യാപിച്ച് മെറ്റ സിഇഒ മാര്‍ക് സക്കര്‍ബര്‍ഗ്. ഇനിമുതല്‍ ഒരു ഗ്രൂപ്പില്‍ 1,024 അംഗങ്ങളെ ഉള്‍പ്പെടുത്താം. കൂടാതെ 32 പേരെ ഉള്‍പ്പെടുത്തി കൊണ്ടുള്ള വീഡിയോ കോള്‍ ഫീച്ചറും വാട്‌സ്‌ആപ്പില്‍ ലഭ്യമാകും. ഗ്രൂപ്പ് ചാറ്റുകള്‍ക്കായി ഒന്നിലധികം ഗ്രൂപ്പുകളെ ഒന്നിച്ചു കൊണ്ടുവരാന്‍ സഹായിക്കുന്ന കമ്മ്യൂണിറ്റീസ് ഫീച്ചറും പ്രഖ്യാപിച്ചിട്ടുണ്ട്.
കമ്മ്യൂണിറ്റീസ് ഫീച്ചര്‍ ഉപയോഗിച്ച് ഗ്രൂപ്പ് ചാറ്റുകള്‍ക്കായി ഒരു കമ്മ്യൂണിറ്റിക്ക് താഴെ വേറെയും ഗ്രൂപ്പുകള്‍ ഉണ്ടാക്കാം. കൂടാതെ മുഴുവന്‍ കമ്മ്യൂണിറ്റിയിലേക്കും വരുന്ന സന്ദേശങ്ങള്‍ വായിക്കാനും പ്രത്യേക വിഷയങ്ങള്‍ ആവശ്യമുള്ളവരുമായി മാത്രം ചര്‍ച്ച ചെയ്യുന്നതിന് ചെറിയ ഗ്രൂപ്പുകള്‍ ഉണ്ടാക്കാനും ഈ ഫീച്ചര്‍ വഴി സാധിക്കും. ആന്‍ഡ്രോയിഡ് ഫോണുകളില്‍ വാട്‌സ്‌ആപ്പിലെ ചാറ്റുകള്‍ക്ക് മുകളിലായാണ് കമ്മ്യൂണിറ്റീസ് ടാബ് കാണുക.