ക്ലബ് ലൈസന്‍സിന്‍റെ മറവില്‍ മദ്യകച്ചവടം: കോട്ടപ്പടി ക്ലബ്ബില്‍ എക്‌സൈസ് പരിശോധന

സ്റ്റോക്ക് രജിസ്റ്റർ എഴുതി സൂക്ഷിച്ചിട്ടില്ല, മദ്യത്തിന്‍റെ പരസ്യം ക്ലബ്ബില്‍ പതിപ്പിച്ചു എന്നീ കുറ്റങ്ങളില്‍ ക്ലബ് ഭാരവാഹികള്‍ക്കെതിരെ കേസെടുത്തിട്ടുണ്ട്

എറണാകുളം : ക്ലബ്ബിന് ലഭിച്ച ലൈസൻസിന്‍റെ മറവിൽ കണക്കില്‍പ്പെടാത്ത മദ്യം സൂക്ഷിക്കുകയും, ക്ലബ് അംഗങ്ങളല്ലാത്തവര്‍ക്ക് മദ്യ വില്‍പ്പന നടത്തുകയും ചെയ്‌തെന്ന പരാതിയില്‍ കോട്ടപ്പടി ക്ലബ്ബിൽ എക്‌സൈസ് സംഘം പരിശോധന നടത്തി.ക്ലബുകൾക്കുള്ള ബാർ ലൈസൻസ് നിയമങ്ങൾ കാറ്റിൽ പറത്തിയാണ് ഇവിടെ മദ്യവിൽപ്പന നടക്കുന്നതെന്നാണ് എക്‌സൈസിന്‍റെ പ്രാഥമികനിഗമനം.

സ്റ്റോക്ക് രജിസ്റ്റർ എഴുതി സൂക്ഷിക്കണമെന്നാണ് നിയമമെങ്കിലും അത് പാലിക്കപ്പെട്ടിരുന്നില്ല. ഒപ്പം മദ്യത്തിന്‍റെ പരസ്യങ്ങള്‍ ക്ലബ്ബിനുള്ളില്‍ പതിച്ചിട്ടുണ്ടായിരുന്നു. ഇതും നിയമവിരുദ്ധമാണ്.പ്രാഥമികമായി കണ്ടെത്തിയ ഈ രണ്ടു നിയമലംഘനങ്ങൾക്ക് എതിരെയാണ് എക്സൈസ് കേസെടുത്തിരിക്കുന്നത്. എറണാകുളം എക്‌സൈസ് സ്‌പെഷല്‍ സ്ക്വാഡ് സർക്കിൾ ഇൻസ്‌പെക്‌ടര്‍ ഷിബു ബി.എല്ലിന്‍റെ നേതൃത്വത്തിലുള്ള സംഘമാണ് പരിശോധന നടത്തിയത്.