ലണ്ടൻ: എലിസബത്ത് രാജ്ഞിയുടെ വിയോഗത്തിൽ അനുശോചനം രേഖപ്പെടുത്തി ഹോളിവുഡിലേയും ബോളിവുഡിലേയും പ്രമുഖർ. 70 വർഷത്തെ ഭരണത്തിന് ശേഷം 96-ആം വയസിൽ അന്തരിച്ച ഏറ്റവും കൂടുതൽ കാലം ബ്രിട്ടീഷ് രാജസിംഹാസനത്തിലിരുന്ന വ്യക്തിയെന്ന റെക്കോർഡ് സ്വന്തമായുള്ള എലിസബത്ത് രാജ്ഞിയുടെ വിയോഗത്തിൽ പ്രശസ്‌തർ അനുശോചനം രേഖപ്പെടുത്തി. ജീവിക്കാനും രാജ്യത്തെ നയിക്കാനും പ്രചോദനം നൽകുന്ന ഒരു സാന്നിധ്യമായിരുന്നു രാജ്ഞി. കൃപയോടും മാന്യതയോടും കരുതലോടെയുമുള്ള നമ്മുടെ ഏറ്റവും മികച്ചതും ഇരുണ്ടതുമായ ചില നിമിഷങ്ങൾ ഓർക്കുന്നു. ബ്രിട്ടീഷ് രാജകുടുംബവുമായി വളരെ അടുപ്പം പുലർത്തിയിരുന്ന സർ എൽട്ടൺ ജോൺ ഇൻസ്റ്റാഗ്രാമിൽ കുറിച്ചു.
പോപ്പ് താരം സർ മൈക്കൽ മിക്ക് ജാഗറും എലിസബത്ത് രാജ്ഞിയെക്കുറിച്ച് സമൂഹമാധ്യമങ്ങളിൽ പങ്കുവെച്ചു. 'എലിസബത്ത് രാജ്ഞി എപ്പോഴും ഇവിടെ തന്നെയുണ്ട്. എന്‍റെ കുട്ടിക്കാലത്ത് രാജ്ഞിയുടെ വിവാഹ വിശേഷങ്ങൾ ടിവിയിൽ കണ്ടത് എനിക്ക് ഓർമയുണ്ട്. സുന്ദരിയായ യുവതിയായി എന്നും എന്‍റെ ഓർമയിൽ നിൽക്കുന്നു. രാജ്യത്തിന്‍റെ പ്രിയപ്പെട്ട മുത്തശ്ശിയുടെ വിയോഗത്തിൽ അനുശോചനം അറിയിക്കുന്നുവെന്നും പോപ്പ് താരം കൂട്ടിച്ചേർത്തു.
ബ്ലാക്ക് ആൻഡ് വൈറ്റ് ചിത്രത്തോടൊപ്പമാണ് ഹെലൻ മിറൻ എലിസബത്ത് രാജ്ഞിയുടെ വിയോഗത്തിൽ അനുശോചനം അറിയിച്ചത്. ഒരു എലിസബത്തിയൻ ആയതിൽ ഞാൻ അഭിമാനിക്കുന്നുവെന്നും ഹെലൻ കൂട്ടിച്ചേർത്തു. രാജ്ഞിയോടുള്ള സ്‌നേഹം പോൾ മക്കാർട്ട്‌നിയും പ്രകടിപ്പിച്ചു. ദൈവം എലിസബത്ത് രാജ്ഞിയെ അനുഗ്രഹിക്കട്ടെ. രാജ്ഞി സമാധാനത്തിൽ വിശ്രമിക്കട്ടെ എന്ന് മക്കാർട്ട്‌നി ട്വീറ്റിൽ കുറിച്ചു.
എലിസബത്ത് രാജ്ഞിയുടെ വിയോഗത്തിൽ ബോളിവുഡ് താരങ്ങളും സോഷ്യൽ മീഡിയയിൽ അനുശോചനം രേഖപ്പെടുത്തി. നടി സുസ്‌മിത സെൻ തന്‍റെ ഇൻസ്റ്റാഗ്രാം ഹാൻഡിൽ എടുത്ത് ഒരു കുറിപ്പിനൊപ്പം എലിസബത്ത് രാജ്ഞിയുടെ ചിത്രവും പോസ്റ്റ് ചെയ്‌തു. അവിശ്വസനീയവും ആഘോഷിപ്പിക്കപ്പെട്ടതുമായ ജീവിതം. രാജ്ഞിയുടെ ആൾരൂപം. എലിസബത്ത് രാജ്ഞി സമാധാനത്തിൽ വിശ്രമിക്കൂ എന്നായിരുന്നു സുസ്‌മിത സെൻ കുറിച്ചത്. കരീന കപൂർ തന്‍റെ ഇൻസ്റ്റഗ്രാം സ്റ്റോറിയിൽ രാജ്ഞിയുടെ ചിത്രം ഹാർട്ട് ഇമോജിയോടൊപ്പം പങ്കുവെച്ചു.