ടിന്‍ഡറില്‍ പരിചയപ്പെട്ട് പീഡനം ; ലണ്ടനിൽ ഇന്ത്യൻ വംശജനായ ഡോക്‌ടര്‍ക്ക് നാല് വർഷം തടവ്

39കാരനായ മനേഷ് ഗില്ലിനെയാണ് സ്കോട്ടിഷ് കോടതി നാല് വർഷത്തെ തടവിന് ശിക്ഷിച്ചത്

ലണ്ടൻ : യുവതിക്കെതിരെ ലൈംഗികാതിക്രമം നടത്തിയ കേസിൽ ഇന്ത്യൻ വംശജനായ ഡോക്‌ടറെ നാല് വർഷത്തെ തടവിന് ശിക്ഷിച്ച് സ്കോട്ടിഷ് കോടതി. 39കാരനായ മനേഷ് ഗില്ലിനെയാണ് ലൈംഗികാതിക്രമക്കേസിൽ ബുധനാഴ്‌ച(15.06.2022) കോടതി ശിക്ഷിച്ചത്. മനേഷ് ഗിൽ കുറ്റക്കാരനാണെന്ന് കഴിഞ്ഞ ആഴ്‌ച കോടതി കണ്ടെത്തിയിരുന്നു.

2018 ഡിസംബറിലാണ് യുവതിക്കെതിരെ ലൈംഗികാതിക്രമം നടന്നത്. ജനറൽ പ്രാക്‌ടീഷണറായ (ജിപി) മനേഷ് ഗിൽ വിവാഹിതനും മൂന്ന് കുട്ടികളുടെ പിതാവുമാണ്. ഓൺലൈൻ ടിൻഡർ ആപ്പിൽ മൈക്ക് എന്ന പേരിൽ പെൺകുട്ടിയുമായി പരിചയത്തിലാകുകയും സ്റ്റെർലിംഗിലെ ഒരു ഹോട്ടലിൽവച്ച് പീഡിപ്പിക്കുകയുമായിരുന്നു.

ഉഭയസമ്മത പ്രകാരമാണ് ലൈംഗിക ബന്ധത്തിൽ ഏർപ്പെട്ടത് എന്നായിരുന്നു ഗില്ലിന്‍റെ വാദം. എന്നാൽ സമ്മതം നൽകാനോ പ്രതിരോധിക്കാനോ കഴിയാതിരുന്ന സാഹചര്യത്തിലാണ് പെൺകുട്ടിയോട് ഇയാൾ ലൈംഗികാതിക്രമം നടത്തിയത് എന്ന് കോടതിക്ക് ബോധ്യമായതോടെയാണ് ശിക്ഷ വിധിച്ചത്.