ഹൈദരാബാദ് : 2023 മാർച്ച് 28 ചൊവ്വാഴ്ച ശാസ്ത്രകുതുകികള്ക്ക് ഏറെ പ്രധാനപ്പെട്ട ദിവസമാണ്. ആകാശത്ത് ഗ്രഹങ്ങളുടെ അപൂർവ പ്രതിഭാസമാണ് ദൃശ്യമാകുന്നത്. എല്ലാ വർഷവും സൗരയൂഥത്തിലെ ചില ഗ്രഹങ്ങൾ ഒരു നേർരേഖയിൽ വരുന്ന പ്രതിഭാസം ആകാശത്ത് ദൃശ്യമാകാറുണ്ട്. 'പ്ലാനറ്റ് പരേഡ് ' അല്ലെങ്കിൽ ' പ്ലാനറ്റ് അലൈൻമെന്റ് ' എന്നാണ് ഇത് അറിയപ്പെടുന്നത്. പ്ലാനറ്റ് പരേഡിൽ ബുധൻ, ശുക്രൻ, ചൊവ്വ, വ്യാഴം, യുറാനസ് തുടങ്ങിയ ഗ്രഹങ്ങളെ ഭൂമിയിലുള്ളവർക്ക് കാണാൻ കഴിയും എന്നതാണ് ഈ കാഴ്ചയുടെ പ്രത്യേകത.
ദൃശ്യം സൂര്യാസ്തമയ സമയത്ത് പടിഞ്ഞാറ് ഭാഗത്ത് : ഇന്ന് സൂര്യാസ്തമയ സമയം മുതലാണ് ഈ കാഴ്ച ആകാശത്ത് ദൃശ്യമാകുന്നതെന്ന് ഉത്തർപ്രദേശിലെ വീർ ബഹാദൂർ സിംഗ് പ്ലാനറ്റോറിയത്തിലെ ജ്യോതി ശാസ്ത്രജ്ഞനായ അമർ പാൽ സിംഗ് അറിയിച്ചു. സൂര്യാസ്തമയ സമയത്ത് ആളുകൾ പടിഞ്ഞാറോട്ട് അഭിമുഖീകരിക്കാനും തെളിഞ്ഞ ആകാശത്തേക്ക് നോക്കാനും ഗ്രഹങ്ങളുടെ ഈ അത്ഭുത പ്രതിഭാസത്തിന് സാക്ഷ്യം വഹിക്കാനും അദ്ദേഹം പറഞ്ഞു. ബൈനോക്കുലറോ ടെലിസ്കോപ്പോ ഉപയോഗിച്ച് നോക്കിയാൽ കൂടുതൽ കൃത്യതയോടെ ഈ ആകാശക്കാഴ്ചയുടെ ദൃശ്യാനുഭവം ലഭിക്കും.
also read:മഞ്ഞുരുകുന്നതും സമുദ്രജലത്തിന് ചൂടേറുന്നതും അന്റാർട്ടിക്കയിലെ ഹിമാനികളുടെ വേഗം കൂട്ടുന്നു ; പഠനങ്ങൾ
പ്ലാനറ്റോറിയത്തിൽ സന്ദർശനാനുമതി : സാധാരണ ദിവസങ്ങളിൽ പോലും ആളുകൾക്ക് ആകാശത്ത് രണ്ടോ മൂന്നോ ഗ്രഹങ്ങളെ കാണാൻ കഴിയും. എന്നാൽ വർഷത്തിലെ ഈ പ്രത്യേക സമയത്ത് ആകാശത്ത് ചന്ദ്രനോടൊപ്പം അഞ്ച് ഗ്രഹങ്ങളെ ഒരുമിച്ച് കാണാൻ സാധിക്കും. യുറാനസ് ഗ്രഹത്തെ കണ്ടെത്താൻ പ്രയാസമാണ്. എന്നാൽ കൂടുതൽ സാങ്കേതികതയുള്ള ടെലസ്കോപ്പിലൂടെ ഈ ദൃശ്യം കാണാനും ഈ പ്രതിഭാസത്തെ കുറിച്ച് കൂടുതൽ അറിയാനും ആളുകൾക്ക് ഗോരഖ്പൂരിലെ വീർ ബഹാദൂർ സിംഗ് പ്ലാനറ്റോറിയം സന്ദർശിക്കാവുന്നതാണ്.