കാബൂള്‍: അഫ്‌ഗാനിസ്ഥാനില്‍ അടിയന്തരമായി മാനുഷിക സഹായം ആവശ്യമുള്ള ഒരു കോടി കുട്ടികളുണ്ടെന്ന് യൂനിസെഫ്. രാജ്യത്ത് ഭക്ഷണവും കുടിവെള്ളവും മരുന്നും ഉള്‍പ്പെടെയുള്ള പ്രാഥമിക ആവശ്യങ്ങള്‍ പോലും ലഭിക്കാത്ത കുട്ടികളുണ്ടെന്നും ഇത് മൂലം പല കുട്ടികളും പോഷകാഹാര കുറവ് നേരിടുകയാണെന്നും അഫ്‌ഗാസ്ഥാനിലെ യൂനിസെഫ് പ്രതിനിധി സാം മോർട്ട് പറഞ്ഞു.
പലായനം ചെയ്യുന്ന കുടുംബങ്ങള്‍ക്ക് കുട്ടികളുടെ പ്രാഥമിക ആവശ്യങ്ങൾ നിറവേറ്റാൻ കഴിയുന്നില്ലെന്ന് അഫ്‌ഗാന്‍ മാധ്യമമായ ടോളോ ന്യൂസ് റിപ്പോര്‍ട്ട് ചെയ്യുന്നു. രാജ്യത്ത് ഭക്ഷ്യക്ഷാമമുണ്ടെന്നും അടിയന്തരമായി സഹായം എത്തിച്ചില്ലെങ്കില്‍ പത്ത് ലക്ഷം കുട്ടികള്‍ പട്ടിണി മൂലം മരണപ്പെടുമെന്ന് ഐക്യരാഷ്‌ട്രസഭ കഴിഞ്ഞ ദിവസം മുന്നറിയിപ്പ് നല്‍കിയിരുന്നു.