ഗൃഹാതുരതയുടെ ആഴങ്ങളിലേക്ക് മലയാളികളെ തളളിയിട്ട് ഒരു ഗാനം. നവാഗതനായ ഫ്രാൻസിസ് ജോസഫ് ജീര തിരക്കഥയെഴുതി സംവിധാനം ചെയ്യുന്ന 'ത തവളയുടെ ത' എന്ന ചിത്രത്തിലെ പുതിയ വീഡിയോ സോങ് ആണ് പ്രേക്ഷകമനം കീഴടക്കുന്നത്. ബാലു എന്ന മൂന്നാം ക്ലാസുകാരന്‍റെ ജീവിത കഥ പറയുന്ന 'ത തവളയുടെ ത' അവന്‍റെ സ്വപ്‌ന ലോകത്തിലേക്ക് കൂടിയാണ് കാഴ്‌ചക്കാരെ കൊണ്ടുപോകുന്നത്.
'കരയുമെന്നാണോ...' എന്ന വരികളോടെ ആരംഭിക്കുന്ന ഗാനം സൈനാ മ്യൂസിക്കിന്‍റെ ഒഫീഷ്യൽ യൂട്യൂബ് ചാനലിലൂടെയാണ് അണിയറ പ്രവർത്തകർ പുറത്തുവിട്ടത്. നിഖിൽ രാജനാണ് ഈ മനോഹര ഗാനത്തിന് സംഗീതം പകർന്നിരിക്കുന്നത്. ബീയാർ പ്രസാദിന്‍റെതാണ് വരികൾ. ജിതിൻ രാജിന്‍റെ ശബ്‌ദം കൂടി ചേരുമ്പോൾ ഗാനത്തിന്‍റെ മാധുര്യം ഇരട്ടിയാകുന്നു.
മാസ്റ്റർ അൻവിൻ ശ്രീനു ആണ് ചിത്രത്തില്‍ കേന്ദ്ര കഥാപാത്രത്തെ അവതരിപ്പിക്കുന്നത്. കൂടാതെ സെന്തിൽ കൃഷ്‌ണ, അനുമോൾ, എന്നിവരും മുഖ്യ വേഷത്തിലുണ്ട്. ബാലുവായാണ് മാസ്റ്റർ അൻവിൻ ശ്രീനു വേഷമിടുന്നത്. ബാലുവിന്‍റെ അമ്മ ഗംഗാലക്ഷ്‌മിയായി അനുമോളും, അച്ഛൻ വിശ്വനാഥനായി സെന്തിലും എത്തുന്നു.
14 ഇലവൻ സിനിമാസ്, ബിഗ് സ്റ്റോറീസ് മോഷൻ പിക്ചേഴ്‌സ് എന്നിവയുടെ ബാനറിൽ റോഷിത് ലാൽ, ജോൺ പോൾ എന്നിവർ ചേർന്ന് നിർമിച്ചിരിക്കുന്ന ഈ ചിത്രം കുട്ടികൾക്കായുള്ള ഒരു സിനിമ എന്നതിലുപരി ഫാൻ്റസി ഗണത്തിൽ പെടുന്ന ഒരു കുടുംബ ചിത്രം കൂടിയാണ്. അറുപതോളം ബാലതാരങ്ങളും ചിത്രത്തിൽ അണിനിരക്കുന്നുണ്ട്.