ബോളിവുഡ് സൂപ്പര്‍താരം ഷാരൂഖ് ഖാന്‍റെ മകള്‍ സുഹാന ഖാന് സോഷ്യല്‍ മീഡിയയിലെ താരമാണ്. കിംഗ് ഖാന്‍റെ മകളുടെ സിനിമ അരങ്ങേറ്റത്തിനായി ആരാധകര്‍ ഏറെനാളായി കാത്തിരിക്കുകയാണ്. സുഹാനയുടെതായി വരാറുളള മിക്ക സോഷ്യല്‍ മീഡിയ പോസ്റ്റുകളും വാര്‍ത്തകളില്‍ നിറയാറുണ്ട്. മാതൃദിനത്തില്‍ അമ്മ ഗൗരി ഖാന് സുഹാന അയച്ച സമ്മാനത്തിന്‍റെ ചിത്രമാണ് ഇപ്പോള്‍ സോഷ്യല്‍ മീഡിയയില്‍ വൈറലാവുന്നത്.
ഗൗരി ഖാന് തന്നെയാണ് മകള്‍ അയച്ച സമ്മാനത്തിന്‍റെ ചിത്രം സമൂഹ മാധ്യമത്തില്‍ പങ്കുവെച്ചത്. പിങ്ക് റോസുകള്‍ അടങ്ങിയ ബൊക്കയില്‍ ഹാപ്പി മദേഴ്‌സ് ഡേ മാ, ഐ ലവ് യൂ, സുഹാന എന്ന് എഴുതിവെച്ചിട്ടുമുണ്ട് താരപുത്രി. സുഹാനയുടെ ഇതുവരെ കാണാത്ത ഒരു ചിത്രത്തിനൊപ്പം ആണ് മകള്‍ സമ്മാനിച്ച ഗിഫ്റ്റിന്‍റെ ഫോട്ടോയും ഗൗരി ഖാന് പോസ്റ്റ് ചെയ്തത്.
കളര്‍ഫുള്‍ ജാക്കറ്റ് ധരിച്ച സുഹാനയെ ഗൗരി ഖാന് പുറത്തുവിട്ട ചിത്രത്തില്‍ കാണാം. മകളെ ടാഗ് ചെയ്‌തുകൊണ്ടാണ് ഷാരൂഖിന്‍റെ ഭാര്യയുടെ പുതിയ ഇന്‍സ്റ്റഗ്രാം പോസ്റ്റ് വന്നത്. കാത്തിരിപ്പിനൊടുവില്‍ സോയ അക്തര്‍ സംവിധാനം ചെയ്യുന്ന വെബ് സീരീസിലൂടെ അഭിനയരംഗത്തേക്ക് എത്തുകയാണ് സുഹാന. വിദേശ പഠനം കഴിഞ്ഞ് തിരിച്ചെത്തിയ ശേഷമാണ് ഷാരൂഖിന്‍റെ മകള്‍ അഭിനയരംഗത്ത് സജീവമാകുന്നത്.