ജമ്മുകശ്‌മിർ : 'ദി കേരള സ്റ്റോറി' സിനിമയെ ചൊല്ലിയുണ്ടായ സംഘര്‍ഷത്തെ തുടർന്ന് സർക്കാർ മെഡിക്കൽ കോളജ് (ജിഎംസി) ഹോസ്‌റ്റലിലെ 10 വിദ്യാർഥികളെ തിങ്കളാഴ്‌ച അധികൃതർ രണ്ട് മാസത്തേക്ക് സസ്‌പെൻഡ് ചെയ്‌തു. അന്വേഷണം പൂർത്തിയാകുന്നതുവരെ ക്ലാസുകളിൽ കയറുന്നതിനും വിലക്കുണ്ട്. ഞായറാഴ്‌ച രാത്രി ജിഎംസിയിലെ ബോയ്‌സ് ഹോസ്റ്റലിൽ വിവാദ സിനിമയെച്ചൊല്ലി വിദ്യാര്‍ഥികള്‍ രണ്ട് വിഭാഗങ്ങളായി തിരിഞ്ഞുണ്ടായ സംഘർഷത്തിൽ അഞ്ച് പേര്‍ക്ക് പരിക്കേറ്റിരുന്നു.
ക്രമസമാധാന പ്രശ്‌നങ്ങൾ ഉണ്ടാകാതിരിക്കാൻ ഹോസ്‌റ്റല്‍ - കോളജ് പരിസരങ്ങളില്‍ കൂടുതൽ പൊലീസുകാരെ വിന്യസിക്കുന്നത് ഉൾപ്പടെ എല്ലാ മുൻകരുതൽ നടപടികളും സ്വീകരിക്കാൻ ജമ്മുവിലെ സീനിയർ പൊലീസ് സൂപ്രണ്ടിനോട് ജിഎംസി പ്രിൻസിപ്പൽ ശശി സുധൻ ശർമ അഭ്യർഥിച്ചു. 'ആൺകുട്ടികളുടെ ഹോസ്‌റ്റലിലെ വാർഡന്‍റെ റിപ്പോർട്ട് പ്രകാരം, 10 വിദ്യാർഥികളെ രണ്ട് മാസക്കലയളവിലേക്ക് ഹോസ്റ്റലിൽ നിന്ന് സസ്‌പെൻഡ് ചെയ്‌തിട്ടുണ്ട്. കൂടാതെ ഇൻസ്‌റ്റിറ്റ്യൂട്ടിലെ അച്ചടക്ക സമിതിയുടെ അന്വേഷണം പൂർത്തിയാകുന്നതുവരെ ക്ലാസുകളിൽ പങ്കെടുക്കുന്നതിൽ നിന്ന് വിദ്യാർഥികളെ വിലക്കുകയും ചെയ്‌തു' - ശർമ പ്രസ്‌താവനയിൽ അറിയിച്ചു.
ഹോസ്‌റ്റൽ വാർഡന്‍റെ റിപ്പോർട്ട് കോളജിന്‍റെ അച്ചടക്ക സമിതിക്ക് കൈമാറിയിട്ടുണ്ടെന്നും അന്വേഷണം ഏഴ് ദിവസത്തിനുള്ളിൽ പൂർത്തിയാക്കുമെന്നും അദ്ദേഹം കൂട്ടിച്ചേർത്തു. പ്രശ്‌നമുണ്ടായ ദിവസം രാത്രിയിൽ താനും ഹോസ്‌റ്റൽ വാർഡൻമാരും ഫാക്കൽറ്റി അംഗങ്ങളും രാത്രി മുഴുവൻ ഹോസ്റ്റലിൽ ചെലവഴിച്ചിരുന്നു. കുറ്റക്കാർക്കെതിരെ കർശന നടപടിയെടുക്കുമെന്ന് വിദ്യാർഥികൾക്ക് ഉറപ്പുനൽകിയിട്ടുണ്ട്. കാമ്പസിനുള്ളിൽ സമാധാന അന്തരീക്ഷം നിലനിർത്താൻ സ്വീകരിച്ച നടപടികളെക്കുറിച്ച് വിശദീകരിച്ചുകൊണ്ട് ജിഎംസി പ്രിൻസിപ്പൽ പറഞ്ഞു.