Russo Brothers praises Rajamouli: തെന്നിന്ത്യയിലെ പ്രശസ്‌ത സംവിധായകന്‍ എസ്.എസ് രാജമൗലിയെ പുകഴ്‌ത്തി റൂസോ ബ്രദേഴ്സ്. രാജമൗലിയെ കാണാനായതില്‍ സന്തോഷം അറിയിച്ച് രംഗത്തെത്തിയിരിക്കുകയാണ് ഹോളിവുഡ്‌ സംവിധായകര്‍. വിര്‍ച്വല്‍ മീറ്റ് വഴിയായിരുന്നു കൂടിക്കാഴ്‌ച.
മഹാനായ രാജമൗലിയെ കാണാന്‍ സാധിച്ചത് ബഹുമതിയാണെന്നാണ്‌ റൂസോ ബ്രദേഴ്സ് ട്വീറ്റ് ചെയ്‌തത്. റൂസോ ബ്രദേഴ്‌സിന്‍റെ ഈ ട്വീറ്റിന് മറുപടി പറഞ്ഞ് രാജമൗലിയും രംഗത്തെത്തി. 'ബഹുമാനവും സന്തോഷവും എന്‍റേതാണ്. അതൊരു മികച്ച അനുഭവമായിരുന്നു. എന്നും നിങ്ങളുടെ ക്രാഫ്‌റ്റ്‌ പരിചയപ്പെടാനും പഠിക്കാനും കാത്തിരിക്കുന്നു', രാജമൗലി കുറിച്ചു.
റൂസോ ബ്രദേഴ്‌സിന്‍റെ ഏറ്റവും പുതിയ ചിത്രം 'ദി ഗ്രേ മാനി'ന്‍റെയും, രാജമൗലിയുടെ 'ആര്‍ആര്‍ആറി'ന്‍റെയും സ്വീകാര്യതയെ കുറിച്ചുള്ള ചര്‍ച്ചയ്‌ക്കാണ് മൂവരും ഒന്നിച്ചത്. 15 ഭാഷകളിലെ സബ്‌ടൈറ്റിലുകളോടെ മൊത്തം 47 ദശലക്ഷത്തിലധികം മണിക്കൂറാണ് പ്രേക്ഷകര്‍ 'ആര്‍ആര്‍ആര്‍' കണ്ടിരിക്കുന്നത്. ഹോളിവുഡില്‍ നിന്നും ചിത്രത്തിന് ഇത്രയധികം സ്വീകാര്യത ലഭിക്കുമെന്ന്‌ കരുതിയില്ലെന്ന് രാജമൗലി പറഞ്ഞു.