ലോകത്തെമ്പാടുമുള്ള സിനിമാപ്രേമികൾ പ്രതീക്ഷയോടെ കാത്തിരിക്കുന്ന സിനിമയാണ് 'മലൈക്കോട്ടൈ വാലിബൻ'. മലയാളത്തിന്‍റെ മഹാനടൻ മോഹൻലാലിനെ നായകനാക്കി ലിജോ ജോസ് പെല്ലിശ്ശേരി സംവിധാനം ചെയ്യുന്ന ഈ ചിത്രം ജനുവരി 25ന് തിയേറ്ററുകളിലേക്ക് എത്തുകയാണ്. ഇപ്പോഴിതാ പ്രേക്ഷകർക്കായി 'വാലിബൻ ചലഞ്ചു'മായി എത്തിയിരിക്കുകയാണ് മോഹൻലാൽ.
'മലൈക്കോട്ടൈ വാലിബൻ' സിനിമയുടെ പ്രൊമോഷന്‍റെ ഭാഗമായി മോഹൻലാൽ സമൂഹ മാധ്യമങ്ങളിൽ പങ്കുവച്ച വീഡിയോ സോഷ്യൽ മീഡിയയിൽ വൈറലായി കഴിഞ്ഞു. ആരാധകരെ 'വാലിബൻ ചലഞ്ചി'ലേക്ക് സ്വാഗതം ചെയ്‌തുകൊണ്ടാണ് മോഹൻലാൽ ഈ വീഡിയോ പങ്കുവച്ചിരിക്കുന്നത്. ചലഞ്ച് ഏറ്റെടുക്കാൻ നിങ്ങൾ തയ്യാറാണോ എന്ന ക്യാപ്‌ഷനും വീഡിയോയ്‌ക്ക് താഴെ നൽകിയിട്ടുണ്ട് (Mohanlal with vaaliban challenge video as part of Malaikottai Vaaliban promotion).
ഒരു ഡൗൾ കേബിൾ മെഷിനിൽ താരം വ്യായാമം ചെയ്യുന്നതാണ് വീഡിയോയിൽ. 'മലൈക്കോട്ടൈ വാലിബൻ' ടീസറിലെ 'കൺകണ്ടത് നിജം, കാണാത്തത് പൊയ്.. നീ കണ്ടതെല്ലാം പൊയ്, ഇനി കാണപ്പോവുത് നിജം...' എന്ന മോഹൻലാലിന്‍റെ തീ പാറുന്ന ഡയലോഗാണ് വീഡിയോയുടെ പശ്ചാത്തലത്തിൽ മുഴങ്ങുന്നത്.
തങ്ങൾ ഈ വെല്ലുവിളി ഏറ്റെടുക്കുമെന്ന് പറഞ്ഞ് നിരവധി പേരാണ് കമന്‍റ് ബോക്‌സിലേക്ക് ഒഴുകിയെത്തുന്നത്. സിനിമയ്‌ക്കായി കാത്തിരിക്കുകയാണെന്നും ആരാധകർ പറയുന്നു. ഏതായാലും പ്രേക്ഷകരുടെ ആവേശം ഇരട്ടിയാക്കുന്നതാണ് ഇപ്പോൾ പുറത്തുവന്ന ചലഞ്ച് വീഡിയോ.
ഏറെ വ്യത്യസ്‌തമായ പ്രൊമോഷൻ രീതികളാണ് മലൈക്കോട്ടൈ വാലിബനായി അണിയറ പ്രവർത്തകർ നടത്തുന്നത്. മലൈക്കോട്ടൈ വാലിബന്‍റെ കാർട്ടൂൺ പുസ്‌തകവും പുറത്തിറക്കുന്നുണ്ട്. അൻപതിനായിരം കുരുന്നുകളിലേക്ക് അടുത്ത ദിവസം പുസ്‌തകം എത്തിച്ചേരും. കഴിഞ്ഞ ദിവസം റിലീസായ ചിത്രത്തിലെ 'മദഭരമിഴിയോരം...' എന്ന ഗാനവും പ്രേക്ഷകർ ഏറ്റെടുത്തുകഴിഞ്ഞു.