പ്രേക്ഷകപ്രിയ താരങ്ങളായ രജിഷ വിജയൻ, പ്രിയ പ്രകാശ് വാര്യർ എന്നിവരെ കേന്ദ്ര കഥാപാത്രങ്ങളാക്കി നവാഗതനായ സൂരജ് വർമ്മ സംവിധാനം ചെയ്യുന്ന ചിത്രം 'കൊള്ള'യിലെ ആദ്യഗാനം കയ്യടി നേടുന്നു. കഴിഞ്ഞ ദിവസം പുറത്തിറങ്ങിയ ചിത്രത്തിലെ 'ആരാണ് നാം' എന്ന വീഡിയോ ഗാനം മികച്ച പ്രതികരണമാണ് നേടുന്നത്.
പ്രിയ പ്രകാശ് വാര്യർ ആണ് ഈ ഗാനം ആലപിച്ചിരിക്കുന്നത് എന്നതും പാട്ടിന്‍റെ മാറ്റ് കൂട്ടുന്നു. വിനായക് ശശികുമാറിന്‍റെ വരികൾക്ക് മനോഹരമായ സംഗീതം പകർന്നിരിക്കുന്നത് ഷാൻ റഹ്‌മാനാണ്. ഷാൻ ചിത്രത്തില്‍ അഭിനേതാവിന്‍റെ റോളിലും എത്തുന്നുണ്ടെന്നാണ് സൂചന. നേരത്തെ പുറത്തുവന്ന ചിത്രത്തിന്‍റെ ട്രെയിലറിലെ ഷാനിന്‍റെ സാന്നിധ്യം ഇക്കാര്യം ഉറപ്പിക്കുന്നുണ്ട്.
ത്രില്ലർ സ്വഭാവത്തില്‍ ഒരുങ്ങുന്ന 'കൊള്ള' രണ്ടു പെൺകുട്ടികളുടെ ജീവിതങ്ങളിലൂടെ കഥ പറഞ്ഞുപോകുന്ന ചിത്രമാണ് എന്നാണ് അണിയറ പ്രവർത്തകർ പറയുന്നത്. ചിത്രത്തിന്‍റെ ട്രെയിലർ 'കൊള്ള' ഒരു ഇൻവെസ്റ്റിഗേഷൻ ത്രില്ലർ ആണെന്ന സൂചന നൽകിയിരുന്നു. മലയാളത്തിലെ യുവ താരനിരയില്‍ ശ്രദ്ധേയനായ വിനയ് ഫോർട്ടും ചിത്രത്തില്‍ സുപ്രധാന വേഷത്തിലുണ്ട്.
ചിത്രത്തിന്‍റെ പേര് സൂചിപ്പിക്കുന്ന പോലെ, ഒരു കൊള്ളയ്‌ക്കുള്ള തയ്യാറെടുപ്പുകൾ ഗാനരംഗങ്ങളിലും കാണാൻ കഴിയും. കൂടാതെ കഴിഞ്ഞ ദിവസം വാഹനാപകടത്തില്‍ മരണപ്പെട്ട പ്രശസ്‌ത മിമിക്രി കലാകാരന്‍ കൂടിയായ നടന്‍ കൊല്ലം സുധിയും ഗാനത്തില്‍ വന്നുപോകുന്നുണ്ട്. കോട്ടയം-ഏറ്റുമാനൂർ പോലൊരു സ്ഥലത്ത് നടക്കുന്ന ഒരു മോഷണവും, അതുമായി ബന്ധപ്പെട്ട അന്വേഷണവുമാണ് ചിത്രത്തിന്‍റെ ഇതിവൃത്തം എന്നാണ് വിവരം.