മലയാളികളുടെ ഇഷ്‌ടതാരം ധ്യാന്‍ ശ്രീനിവാസന്‍ നായകനായെത്തുന്ന പുതിയ ചിത്രം 'ബുള്ളറ്റ് ഡയറീസി'ലെ ഗാനം ശ്രദ്ധ നേടുന്നു. കഴിഞ്ഞ ദിവസം പുറത്തുവന്ന ചിത്രത്തിലെ 'സൂര്യൻ നടന്നു വേഗം' എന്നു തുടങ്ങുന്ന പുതിയ ഗാനമാണ് ആസ്വാദകഹൃദയം കീഴടക്കുന്നത്. പ്രയാഗ മാർട്ടിനാണ് ചിത്രത്തിലെ നായിക.
കൈതപ്രം ദാമോദരൻ നമ്പൂതിരിയാണ് ഗാനത്തിന്‍റെ വരികളെഴുതിയത്. മലയാളത്തിൽ ഒട്ടനവധി ഹിറ്റുകൾ ഒരുക്കിയ ഷാൻ റഹ്മാനാണ് ഈണം പകർന്നിരിക്കുന്നത്. ലിബിൻ സ്‌കറിയ ആണ് ഗാനം ആലപിച്ചിരിക്കുന്നത്. മികച്ച പ്രതികരണമാണ് 'സൂര്യൻ നടന്നു വേഗം' ഗാനം നേടുന്നത് (Dhyan Sreenivasan Prayaga Martin Sooryan Nadanu Song Bullet Diaries).
ചിത്രത്തിലെ നേരത്തെ പുറത്തിറങ്ങിയ ഗാനങ്ങളും പ്രേക്ഷകർ ഏറ്റെടുത്തിരുന്നു. 'ഞാനും എൻ ആടും', 'മിഴികൾ വാനിലാരെ തേടുന്നു' എന്നീ പാട്ടുകളാണ് അണിയറ പ്രവർത്തകർ നേരത്തെ പുറത്തുവിട്ടത്. ഇരു ഗാനങ്ങളും പ്രേക്ഷക സ്വീകാര്യത നേടിയിരുന്നു. ഇപ്പോഴിതാ പുതിയ ഗാനവും ആസ്വാദകർ നെഞ്ചേറ്റുകയാണ്.
സന്തോഷ് മണ്ടൂര്‍ ആണ് ഈ ചിത്രത്തിന്‍റെ രചനയും സംവിധാനവും നിർവഹിച്ചിരിക്കുന്നത്. രഞ്ജി പണിക്കര്‍, ജോണി ആന്‍റണി, സുധീര്‍ കരമന, ശ്രീകാന്ത് മുരളി, അല്‍ത്താഫ് സലിം, ഷാലു റഹീം, ശ്രീലക്ഷ്‌മി എന്നിവർ മറ്റു പ്രധാന കഥാപത്രങ്ങളെ അവതരിപ്പിക്കുന്ന ചിത്രം റിലീസിനൊരുങ്ങുകയാണ്.
'ചൂടാറുംനേരം' മേക്കിങ് വീഡിയോ പുറത്ത്: ധ്യാൻ ശ്രീനിവാസൻ നായകനായെത്തുന്ന മറ്റൊരു പ്രധാന ചിത്രമാണ് 'ചീനാ ട്രോഫി'. അനിൽ ലാൽ സംവിധാനം ചെയ്യുന്ന ഈ സിനിമയ്‌ക്കായി സിനിമാസ്വാദകർ പ്രതീക്ഷയോടെയാണ് കാത്തിരിക്കുന്നത്. ചിത്രത്തിലെ ഒരു ഗാനത്തിന്‍റെ മേക്കിങ് വീഡിയോ അണിയറ പ്രവർത്തകർ പുറത്തുവിട്ടു (Cheena Trophy Choodarum song making video). ചിത്രത്തിലെ 'ചൂടാറുംനേരം' എന്ന ഗാനത്തിന്‍റെ മേക്കിങ് വീഡിയോയാണ് പുറത്തുവിട്ടത്.