ധ്യാന്‍ ശ്രീനിവാസന്‍റെ Dhyan Sreenivasan റിലീസിനൊരുങ്ങുന്ന ഏറ്റവും പുതിയ ചിത്രങ്ങളില്‍ ഒന്നാണ് 'നദികളില്‍ സുന്ദരി യമുന' Nadhikalil Sundari Yamuna. ചിത്രത്തിലെ പുതിയ ഗാനം പുറത്തിറങ്ങി. പ്രേക്ഷക ഹൃദയങ്ങളെ തൊട്ടുണര്‍ത്തുന്ന 'പുതുനാമ്പുകള്‍' Puthunaambukal എന്ന ഗാനമാണ് പുറത്തിറങ്ങിയത്.
മനു മഞ്ജിത്തിന്‍റെ ഗാന രചനയില്‍ അരുണ്‍ മുരളീധരനാണ് 'പുതുനാമ്പുകള്‍'ക്ക് സംഗീതം നല്‍കി ആലപിച്ചിരിക്കുന്നത്. ചിത്രത്തിലെ രണ്ടാമത്തെ ഗാനമാണിത്. 2.40 മിനിറ്റ് ദൈര്‍ഘ്യമുള്ള ഗാന രംഗത്തിലുടനീളം കൈ ഒടിഞ്ഞ് വിശ്രമത്തില്‍ കഴിയുന്ന ധ്യാന്‍ ശ്രീനിവാസനെയാണ് കാണാനാവുക. ഈ വിശ്രമ വേളയില്‍ വിവാഹ സ്വപ്‌നങ്ങള്‍ കാണുകയാണ് ധ്യാനിന്‍റെ കഥാപാത്രം.
നവാഗതരായ വിജേഷ് പനത്തൂര്‍, ഉണ്ണി വെല്ലോറ എന്നിവര്‍ ചേര്‍ന്നാണ് സിനിമയുടെ തിരക്കഥയും സംവിധാനവും നിര്‍വഹിച്ചിരിക്കുന്നത്. സിനിമാറ്റിക്ക ഫിലിംസ് എല്‍എല്‍പിയുടെ ബാനറില്‍ വിലാസ് കുമാര്‍, സിമി മുരളി കുന്നുംപുറത്ത് എന്നിവര്‍ ചേര്‍ന്നാണ് നിര്‍മാണം. വാട്ടർമാൻ മുരളിയാണ് സിനിമയുടെ അവതരണം.
കണ്ണൂരിലെ നാട്ടുമ്പുറങ്ങളാണ് 'നദികളില്‍ സുന്ദരി യമുന'യുടെ പശ്ചാത്തലം. ഇവിടുത്തെ സാധാരണക്കാരായ മനുഷ്യരുടെ ജീവിതം സിനിമയില്‍ വരച്ചുകാട്ടുന്നു. കണ്ണന്‍, വിദ്യാധരന്‍ എന്നീ രണ്ട് യുവാക്കളുടെ കഥയാണ് ചിത്രം പറയുന്നത്. ധ്യാന്‍ ശ്രീനിവാസന്‍ കണ്ണന്‍ എന്ന കഥാപാത്രത്തെയും അജു വര്‍ഗീസ് വിദ്യാധരന്‍ എന്ന കഥാപാത്രത്തെയും അവതരിപ്പിക്കും.
ഇവരെ കൂടാതെ സുധീഷ്, കലാഭവന്‍ ഷാജോണ്‍, നിര്‍മ്മല്‍ പാലാഴി, നവാസ് വള്ളിക്കുന്ന്, സോഹന്‍ സിനുലാല്‍, രാജേഷ് അഴിക്കോടന്‍, കിരണ്‍ രമേശ്, ഭാനു പയ്യന്നൂര്‍, ശരത് ലാല്‍, ദേവരാജ് കോഴിക്കോട്, അനീഷ്, ആമി, പാര്‍വ്വണ, ഉണ്ണിരാജ, വിസ്‌മയ ശശികുമാർ എന്നിവരും ചിത്രത്തില്‍ അണിനിരക്കുന്നു.