ഓണം റിലീസായി തിയറ്ററുകളില്‍ എത്തിയ വിനയന്‍ ചിത്രമാണ് പത്തൊമ്പതാം നൂറ്റാണ്ട്. 1825ല്‍ ജനിച്ച ആറാട്ടുപുഴ വേലായുധന്‍ എന്ന ധീര യോദ്ധാവിന്‍റെ ജീവിതം പ്രമേയമാക്കിയ ചിത്രത്തെ പ്രശംസിച്ചുകൊണ്ട് നിരവധി പേരാണ് രംഗത്തു വന്നിരിക്കുന്നത്. സംവിധായകന് വിനയന്‍റെ സംവിധാന മികവ് ഏറ്റവും കൂടുതല്‍ പ്രതിഫലിച്ച ചിത്രം കൂടിയാണ് പത്തൊമ്പതാം നൂറ്റാണ്ട്.
ചിത്രത്തില്‍ ആറാട്ടുപുഴ വേലായുധനായി എത്തിയ സിജു വില്‍സണും മികച്ച പ്രകടനം കാഴ്‌ചവച്ചു. സിജുവിന്‍റെ കരിയറിലെ നാഴികക്കല്ലാകും പത്തൊമ്പതാം നൂറ്റാണ്ട് എന്നാണ് നിരൂപകര്‍ പറയുന്നത്. സിനിമ മേഖലക്ക് പുറമെ രാഷ്‌ട്രീയ നേതാക്കളും ചിത്രം കണ്ട അനുഭവം പങ്കുവച്ചിട്ടുണ്ട്.
ചിത്രത്തെയും അണിയറ പ്രവര്‍ത്തകരെയും അഭിനന്ദിച്ചു കൊണ്ട് സിപിഎം എറണാകുളം ജില്ല കമ്മിറ്റി അംഗം അഡ്വ. കെ എസ് അരുണ്‍ കുമാര്‍ ഫേസ്‌ബുക്ക് കുറിപ്പ് പങ്കുവച്ചിരിക്കുകയാണിപ്പോള്‍. കേരളത്തിന്‍റെ നവോത്ഥാന ചരിത്രത്തില്‍ വേണ്ടത്ര പരിഗണന ലഭിക്കാതെ പോയ സമര നായകനാണ് ആറാട്ടുപുഴ വേലായുധന്‍ എന്ന് അരുണ്‍കുമാര്‍ കുറിപ്പില്‍ പറയുന്നു.
ഫേസ്‌ബുക്ക് കുറിപ്പിന്‍റെ പൂര്‍ണ രൂപം: ശ്രീ. വിനയൻ സംവിധാനം ചെയ്‌ത "പത്തൊമ്പാതാം നൂറ്റാണ്ട്" എന്ന സിനിമ കണ്ടു. ലോകത്ത് ഒരിടത്തും കാണാത്ത അയിത്തവും അന്തവിശ്വാസവും അനാചാരവും കൊടികുത്തി വാണിരുന്ന ഒരു സ്ഥലമായിരുന്നു മൊത്തത്തിൽ കേരളം. മേൽ പറഞ്ഞ ആചാരങ്ങൾക്ക് പുറമെ അടിമത്തം, തീണ്ടാപ്പാട്, ജന്മി സമ്പ്രദായം, സ്‌ത്രീ വിരോധം, പക്ഷപാദ ചികിത്സ രീതികൾ, ഊഴിയം വേല (കൂലി ഒന്നും തന്നെ ഇല്ലാതെ ജോലി), മറ്റ് വിവേചനങ്ങൾ തുടങ്ങി അക്കാലത്ത് നിലനിന്നിരുന്ന എല്ലാ സാമൂഹിക തിന്മകളും സവർണർ, ദളിതവിഭാഗത്തെ ചൂഷണം ചെയ്യുന്നതിനുള്ള ഉപാധികളായി ഉപയോഗിച്ചിരുന്നു.
ഈ നാടിനേയാണ് വിവേകാനന്ദൻ ഭ്രാന്താലയം എന്ന് വിശേഷിപ്പിച്ചത്. ഭ്രാന്താലയത്തെ മനുഷ്യാലയമാക്കി മാറ്റിയതിനു പിന്നിൽ സാമൂഹ്യ പരിഷ്‌കർത്തക്കാളുടെയും നവോത്ഥാന നായകമാരുടെയും ത്യാഗോജ്വലമായ പോരാട്ടങ്ങളാണ് പത്തൊമ്പാതാം നൂറ്റാണ്ടിലും ഇരുപതാം നൂറ്റാണ്ടിന്‍റെ ആദ്യ പകുതിയിലും തിരുവിതാംകൂറിലും കൊച്ചിയിലും മലബാറിലും നടന്നത്. നമ്മുടെ നവോത്ഥാന ചരിത്രത്തിൽ വേണ്ടത്ര തെളിച്ചത്തോടെ രേഖപ്പെടുത്താതെ പോയ പേരാണ് ആദ്യകാല സമരനായകൻ ആറാട്ടുപുഴ വേലായുധ പണിക്കരുടേത്.
1825-ൽ ജനിച്ച ആറാട്ടുപുഴ വേലായുധ പണിക്കരുടെ ജീവിതവും പോരാട്ടങ്ങളും ഭംഗിയായി ചിത്രീകരിച്ചിരിക്കുന്ന സിനിമയാണ് "പത്തൊമ്പാതാം നൂറ്റാണ്ട്". അത് ഒരു സിനിമ മാത്രമല്ല ഈ നാടിന്‍റെ പോരാട്ടചരിത്രങ്ങളുടെ നേർക്കാഴ്‌ച കൂടിയാണ്. തൊട്ടുകൂടായ്‌മയും തീണ്ടലും അനാചാരങ്ങളും ഒക്കെനിലനിന്ന നാട്ടിൽ ആയുധ വിദ്യയിലും കളരി പാരമ്പര്യത്തിലും കരുത്തു നേടി ആറാട്ടുപുഴ വേലായുധ പണിക്കർ നടത്തിയ പോരാട്ടങ്ങൾ നന്നായി ചിത്രീകരിക്കാൻ സംവിധായകന് കഴിഞ്ഞു.
സവർണാധിപത്യത്തെ വെല്ലുവിളിച്ച് മംഗലത്തെ ഇടയ്ക്കാട് ജ്ഞാനേശ്വരി ക്ഷേത്രം 1853 ലും ചേർത്തല തണ്ണീർമുക്കം ചെറുവാരണം ക്ഷേത്രം 1856 ലും വേലായുധപണിക്കർ സ്ഥാപിച്ചത്, അരുവിപ്പുറത്ത് ശ്രീനാരായണ ഗുരു ശിവ പ്രതിഷ്‌ഠ നടത്തിയതിന് 3 പതിറ്റാണ്ടുകൾക്ക് മുൻപെയാണ്. അതുപോലെ തന്നെ സവർണ കലാരൂപമായ കഥകളിയെ എല്ലാ ജാതി വിഭാഗങ്ങൾക്കും പ്രാപ്യമാക്കി മാറ്റിയതും വളരെ മനോഹരമായി "പത്തൊൻപതാം നൂറ്റാണ്ടിൽ" ചിത്രീകരിച്ചിരിക്കുന്നു. തിരുവിതാംകൂറിൽ മുലക്കരം, തലക്കരം ഏണിക്കരം, കത്തിക്കരം, വലക്കരം, വണ്ടിക്കരം, മീശക്കരം തുടങ്ങി ശരീരത്തിന്മേലും തൊഴിലുപകരണങ്ങൾക്കുമേലും കരം ചുമത്തിയിരുന്ന നികൃഷ്‌ട കാലത്തെ ഒട്ടും തീവ്രത നഷ്‌ടപെടാതെ ചിത്രീകരിക്കാൻ സംവിധായകന് കഴിഞ്ഞിട്ടുണ്ട്.