മോദി ദുർബലനായ പ്രധാനമന്ത്രി; പ്രിയങ്ക ഗാന്ധി മലപ്പുറം: ആദിവാസികളുടെ വനാവകാശ നിയമത്തില്‍ ബിജെപി വെള്ളം ചേര്‍ക്കുകയാണെന്ന് പ്രിയങ്കഗാന്ധി. കോൺഗ്രസ് അധികാരത്തിൽ വന്നാൽ നിയമം പുനഃസ്ഥാപിക്കും. നിലമ്പൂരിൽ കോൺഗ്രസ് അധ്യക്ഷൻ രാഹുൽ ഗാന്ധിയുടെ തെരഞ്ഞെടുപ്പ് പൊതുയോഗത്തിൽ സംസാരിക്കുകയായിരുന്നു എഐസിസി ജനറൽ സെക്രട്ടറി പ്രിയങ്ക ഗാന്ധി. കോൺഗ്രസ് അധികാരത്തിലെത്തിയാൽ ഭൂമിയില്ലാത്തവർക്ക് ഭൂമി ലഭ്യമാക്കാൻ ശ്രമിക്കും. വയനാട്ടിലെ കര്‍ഷകര്‍ പ്രതിസന്ധിയിലാണ്, നിരവധി കര്‍ഷകര്‍ ആത്മഹത്യയുടെ വക്കിലാണ്. ബിജെപി സർക്കാരിൻറെ കർഷകരോടുള്ള നയമാണ് ഇതിനു കാരണമെന്ന് പ്രിയങ്കഗാന്ധി പറഞ്ഞു. അഞ്ചുവർഷം ഇന്ത്യ ഭരിച്ചത് ദുർബലനായ പ്രധാനമന്ത്രിയാണ് .ഒന്നും ചെയ്യാത്ത പ്രധാനമന്ത്രിക്ക് ജനങ്ങൾ മറുപടി നൽകണമെന്നും പ്രിയങ്ക ആവശ്യപ്പെട്ടു. പ്രതിപക്ഷ നേതാവ് രമേശ് ചെന്നിത്തല എഐസിസി സെക്രട്ടറിമാരായ കെ സി വേണുഗോപാൽ മുകൾ വാസ്നിക് ആര്യാടൻ മുഹമ്മദ് തുടങ്ങിയവർ യോഗത്തിൽ പങ്കെടുത്തു.
