പാലക്കാട്: പത്തുവയസുള്ള കുട്ടിയെ ലൈംഗികമായി പീഡിപ്പിച്ച യുവാവിന് മുപ്പത്തിമൂന്നര വർഷം തടവും രണ്ട് ലക്ഷം രൂപ പിഴയും ശിക്ഷ. ചാലിശ്ശേരി പൊലീസ് രജിസ്റ്റർ ചെയ്ത കേസിൽ പട്ടാമ്പി ഫാസ്റ്റ് ട്രാക്ക് കോടതിയാണ് അറയിൽ വീട്ടിൽ ഹുസൈന് (40) ശിക്ഷ വിധിച്ചത്. പട്ടിക ജാതി വിഭാഗത്തിൽപെട്ട കുട്ടിയെ തന്‍റെ വീട്ടിനകത്തുള്‍പ്പടെ വച്ച് ഹുസൈന് പീഡിപ്പിച്ചെന്നാണ് കേസ്.
ചാലിശേരി ജനമൈത്രി പൊലീസിൻ്റെ നേതൃത്വത്തിൽ വട്ടത്തുന്നിൽ നടത്തിയ കുടുംബയോഗത്തിൽ വെച്ച് നാല് കുട്ടികൾ സംഭവം വെളിപ്പെടുത്തുകയായിരുന്നു. തുടർന്ന് ചൈൽഡ് ലൈൻ പ്രവർത്തകർ വിഷയത്തിൽ ഇടപെടുകയും കുട്ടികളുടെ മൊഴി രേഖപ്പെടുത്തുകയും ചെയ്തു.