തിരുവനന്തപുരം :ഊർജ വകുപ്പിന്‍റെ പ്രവർത്തനങ്ങൾക്ക് ചോദ്യോത്തരവേളയിൽ മന്ത്രി എം.എം മണിക്ക് ഭരണപക്ഷ എം.എൽ.എ മാരുടെ പ്രശംസ. മന്ത്രിയെ അഭിനന്ദിക്കാൻ ഭരണപക്ഷ അംഗങ്ങള്‍ക്ക് വിപ്പ് നൽകിയിട്ടുണ്ടെന്ന് പ്രതിപക്ഷ നേതാവ് രമേശ് ചെന്നിത്തല പരിഹസിച്ചു. എളിയവനായ തന്നെ അഭിനന്ദിക്കുന്നതിൽ പ്രതിപക്ഷ നേതാവിന് അസഹിഷ്ണുതയെന്ന മന്ത്രിയുടെ മറുപടി സഭയിൽ ചിരി പടർത്തി. ഊർജ രംഗത്തെ കാര്യക്ഷമത സംബന്ധിച്ച ചോദ്യങ്ങളോടെയാണ് ഇന്ന് നിയമസഭ ആരംഭിച്ചത്. തടസരഹിതമായ വൈദ്യുതി വിതരണം, വകുപ്പിലെ സേവനങ്ങളുടെ ഗുണമേന്മ, സമ്പൂർണ വൈദ്യുതീകരണം അങ്ങനെ വൈദ്യുത വകുപ്പിനെയും മന്ത്രിയെയും അകമഴിഞ്ഞ് പ്രശംസിച്ചാണ് ഭരണപക്ഷ എം.എൽ.എമാർ ചോദ്യങ്ങൾ ഉന്നയിച്ചത്.
ഭരണപക്ഷ എം.എൽ.എമാരുടെ ചോദ്യങ്ങൾക്കു ശേഷം ഊഴം കാത്തിരുന്ന പ്രതിപക്ഷ നേതാവ് രമേശ് ചെന്നിത്തല മന്ത്രിയെ അഭിനന്ദിക്കാൻ വിപ്പ് നൽകിയിരിക്കുകയാണെന്ന് പരിഹസിച്ചു.