26-ാമത് രാജ്യാന്തര ചലച്ചിത്രമേള; ഓൺലൈൻ റിസർവേഷൻ നാളെ മുതൽ

രാവിലെ 8 മുതൽ സീറ്റുകൾ പൂർണ്ണമാകുന്നതുവരെയാണ് റിസർവേഷൻ അനുവദിക്കുക.

തിരുവനന്തപുരം:26-ാമത് രാജ്യാന്തര ചലച്ചിത്രമേളയുടെ സീറ്റ് റിസർവേഷൻ ഉദ്ഘാടന ദിവസമായ വെള്ളിയാഴ്‌ച (18.03.22) രാവിലെ 8 മണി മുതൽ ആരംഭിക്കും. ഓൺലൈനായി വേണം സീറ്റുകൾ രജിസ്റ്റർ ചെയ്യാൻ. രാവിലെ 8 മുതൽ സീറ്റുകൾ പൂർണമാകുന്നതു വരെയാണ് റിസർവേഷൻ അനുവദിക്കുക. ഇത്തവണ ഓഫ്‌ലൈൻ റിസർവേഷൻ ഉണ്ടായിരിക്കില്ല.

രജിസ്ട്രേഷൻ നമ്പറും പാസ് വേർഡും സിനിമയുടെ കോഡും ഉപയോഗിച്ചാണ് സീറ്റുകൾ ബുക്ക് ചെയ്യേണ്ടത്. ഫെസ്റ്റിവലിൻ്റെ ഔദ്യോഗിക വെബ്സൈറ്റായ www.iffk.in ൽ ലോഗിൻ ചെയ്‌തോ പ്ലേ സ്റ്റോറിൽ നിന്നും ഡൗൺ ലോഡ് ചെയ്യുന്ന IFFK ആപ്പ് വഴിയോ സീറ്റുകൾ റിസർവ് ചെയ്യാം.

നിശാഗന്ധി ഓപ്പൺ തിയേറ്ററിൽ ഒഴികെ എല്ലാ തിയേറ്ററുകളിലും റിസർവേഷൻ അനുവദിച്ചിട്ടുണ്ട്. പ്രദർശനത്തിന് 24 മണിക്കൂർ മുമ്പു മുതൽ റിസർവേഷൻ ആരംഭിക്കും. കൂടാതെ പ്രദർശനത്തിന് 15 മിനിട്ടുകൾക്ക് മുൻപെങ്കിലും ഡെലിഗേറ്റുകൾ തിയേറ്ററിൽ പ്രവേശിച്ചിരിക്കണം.