മരത്തിന് മുകളിൽ നിന്ന് വിദ്യാർഥി താഴെ വീണ സംഭവം; മനുഷ്യാവകാശ കമ്മിഷൻ കേസെടുത്തു

സംഭവത്തിൽ അന്വേഷണം നടത്തി 15 ദിവസത്തിനകം റിപ്പോർട്ട് സമർപ്പിക്കാൻ ജില്ലാ കലക്‌ടറോട് മനുഷ്യാവകാശ കമ്മീഷൻ ആവശ്യപ്പെട്ടിട്ടുണ്ട്

തിരുവനന്തപുരം:പഠനാവശ്യത്തിനായിനെറ്റ്‌വർക്ക് ലഭിക്കാൻ മൊബൈൽ ഫോണുമായി മരത്തിൽ കയറി വിദ്യാർഥി മരത്തിൽ നിന്ന് താഴെ വീണ് പരിക്കേറ്റ സംഭവത്തിൽ സംസ്ഥാന മനുഷ്യാവകാശ കമ്മിഷൻ കേസെടുത്തു. സംഭവത്തിൽ കണ്ണൂർ ജില്ലാ കലക്‌ടർ അന്വേഷണം നടത്തി 15 ദിവസത്തിനകം റിപ്പോർട്ട് സമർപ്പിക്കണമെന്ന് കമ്മീഷൻ അംഗം ബൈജുനാഥ്‌ ആവശ്യപ്പെട്ടു.

ചിറ്റാരിപ്പറമ്പ് കണ്ണവം വനമേഖലയിലെ പന്നിയോട് ആദിവാസി കോളനിയിൽ അനന്ദു ബാബുവാണ് നട്ടെല്ലിന് പരിക്കേറ്റ് ഗുരുതരാവസ്ഥയിൽ ചികിത്സയിൽ ഉള്ളത്. പ്ലസ്‌വൺ അപേക്ഷ സംബന്ധിച്ച കാര്യങ്ങൾ നെറ്റില്‍ തിരയുന്നതിനായാണ് അനന്തു മരത്തിന് മുകളിൽ കയറിയത്. അവിടെ നിന്ന് താഴേക്ക് വീഴുകയായിരുന്നു.

പ്രദേശത്ത് മൊബൈൽ കവറേജ് ലഭിക്കുന്നില്ലെന്ന് വ്യാപക പരാതിയുണ്ട്. മരങ്ങളുടെ മുകളിലും ഏറുമാടത്തിലിരുന്നുമാണ് കോളനിയിലെ കുട്ടികൾ ഓൺലൈൻ ക്ലാസുകളിൽ പങ്കെടുക്കുന്നത്.